تەڭىز جاياۋ اسكەرلەرىنىڭ جاس ساربازدارى العاش رەت جاۋىنگەرلىك اتىس جۇرگىزدى

اۆتوماتتى قولىنا العاش رەت ۇستاپ تۇرعان ادام ءۇشىن بۇل وتە جاقسى ناتيجە

«ويماشا» پوليگونىندا «باتىس» وڭىرلىك قولباسشىلىعىنىڭ 25744 اسكەري بولىمىنە وسى كوكتەمدە مەرزىمدى اسكەري قىزمەت وتكەرۋگە كەلگەن 300-دەن استام جاس سارباز العاشقى جاۋىنگەرلىك اتىستارعا قاتىستى، دەپ حابارلايدى Almaty-akshamy.kz.

ساربازدار الدىمەن اتىس قارۋىنىڭ سيپاتتامالارىن، وق اتۋ تەحنيكاسىن جانە قاۋىپسىزدىك شارالارىن زەردەلەدى. وق-دارىلەردى الىپ، قارۋدى وقتاۋدان باستاپ، اتىس كەزىندەگى قاۋىپسىزدىك شارالارىن ساقتاۋعا دەيىنگى بارلىق ءىس-قيمىل ەلەمەنتتەرى كەزەڭ-كەزەڭىمەن پىسىقتالدى.

دايىندىق شارالارىنان كەيىن جاۋىنگەرلەر اك-74 اۆتوماتىنان وق اتۋدىڭ العاشقى جاتتىعۋلارىن ورىندادى. اتىس قورىتىندىسى بويىنشا 25744 اسكەري ءبولىمى جاس ساربازدار روتاسىنىڭ كومانديرى كاپيتان سەرىكجان تورتايەۆ قاتارداعى جاۋىنگەرلەر راۋان بازاربايەۆتى، بەحرۋز وماروۆتى جانە كيريلل نەستەروۆتى ەرەكشە اتاپ ءوتتى.

 – اۆتوماتتى قولىنا العاش رەت ۇستاپ تۇرعان ادام ءۇشىن بۇل وتە جاقسى ناتيجە. ءبىزدىڭ بولىمگە ەلىمىزدىڭ بارلىق وڭىرىنەن اسكەرگە شاقىرىلۋشىلار كەلدى. ولاردىڭ جاۋىنگەرلىك دايىندىققا قىزىعۋشىلىعى مەن وتانعا قىزمەت ەتۋگە دەگەن ىنتاسىن اتاپ وتكىم كەلەدى، – دەدى روتا كومانديرى.

قىزمەت بارىسىندا كومانديرلەر مەن تاجىريبەلى تالىمگەرلەردىڭ باسشىلىعىمەن جاستار اسكەري تەحنيكامەن جانە قارۋ-جاراقپەن جۇمىس ىستەۋدى ۇيرەنىپ، اسكەري-ەسەپتىك ماماندىققا يە بولادى.

تاياۋ كۇندەرى جاۋىنگەرلىك دايارلىقتىڭ نەگىزدەرىن مەڭگەرگەن جاس جاۋىنگەرلەر اسكەري انت قابىلداپ، وتان قورعاۋشىلار قاتارىنا قوسىلادى.