ونىڭ سەبەبىن ق ر ۇلتتىق بانك ءتوراعاسى ايتتى.
2022 جىلدىڭ قورىتىندىسىندا تەڭگە 7،1 پايىزعا السىرەدى. بۇل تۋرالى بۇگىن ۇكىمەت وتىرىسىندا ق ر ۇلتتىق بانك ءتوراعاسى عالىمجان ءپىرماتوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2022 جىلى گەوساياسي جاعدايدىڭ شيەلەنىسۋى جانە جاھاندىق قارجى نارىقتارىنداعى قولايسىز احۋال ۇلتتىق ۆاليۋتانىڭ ديناميكاسىنا تەرىس اسەر ەتتى. ناۋرىز ايىندا تەڭگە باعامى 512،17 تەڭگەگە دەيىن السىرەگەننەن كەيىن مامىر ايىندا 414،79 تەڭگەگە دەيىن نىعايدى. جىل قورىتىندىسى بويىنشا تەڭگە باعامى 1 دوللار ءۇشىن 462،66 تەڭگەگە دەيىن، ياعني 7،1 پايىزعا السىرەدى»، - دەدى عالىمجان ءپىرماتوۆ.
ونىڭ اتاپ وتۋىنشە، 2022 جىلى كۆازيمەملەكەتتىك سەكتور سۋبەكتىلەرىنىڭ 5،1 ملرد دوللار مولشەرىندەگى ۆاليۋتالىق ءتۇسىمدى ساتۋى، رەسپۋبليكالىق بيۋدجەتكە ۇلتتىق قوردان ترانسفەرتتەردى قامتاماسىز ەتۋ ءۇشىن 4،3 ملرد دوللار مولشەرىندە ۆاليۋتا ساتۋ، ۇلتتىق بانكتىڭ 1،4 ملرد دوللار مولشەرىندەگى ۆاليۋتالىق ينتەرۆەنسيالارى تەڭگەگە قولداۋ كورسەتتى.
«تەڭگەنىڭ قۇبىلمالىلىعى گەوساياسي جاعدايدىڭ وزگەرۋىنە، ىشكى قاتىسۋشىلاردىڭ كۇتۋلەرىنە جانە الەمدىك نارىقتاعى احۋالعا بايلانىستى بولادى. يكەمدى باعام بەلگىلەۋ ۆاليۋتا نارىعىنداعى جۇمىستىڭ تيىمدىلىگىن ارتتىرۋعا جانە حالىقارالىق رەزەرۆتەردى ساقتاۋعا ىقپال ەتەدى»، - دەدى ۇب ءتوراعاسى.