تەڭگە نەلىكتەن السىرەدى؟

ونىڭ سەبەپتەرىن ق ر ۇلتتىق بانك ءتوراعاسى عالىمجان ءپىرماتوۆ اتادى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«گەوساياسي جاعدايدىڭ ناشارلاۋىنا بايلانىستى قارجى جانە تاۋار نارىقتارىندا بۇرىن-سوڭدى بولماعان شوكتاردىڭ اسەرىمەن دامۋشى ەلدەردىڭ ۆاليۋتالارىمەن بىرگە تەڭگەنىڭ ايىرباستاۋ باعامى وسى جىلعى اقپاندا قۇبىلمالى بولدى. باعامنىڭ نەگىزسىز كۇرت اۋىتقۋلارى كەزىندە قارجىلىق تۇراقتىلىق بويىنشا تاۋەكەلدەردى شەكتەۋ ماقساتىندا ۇلتتىق بانك كەي كۇندەرى ۆاليۋتالىق ينتەرۆەنسيا جۇرگىزدى. ونىڭ كولەمى اقپاندا 273،7 ملن دوللار بولدى. بۇل وپەراسيالار تۋرالى اقپارات جەدەل جاريا ەتىلدى»، - دەدى ۇلتتىق بانك ءتوراعاسى ۇكىمەت وتىرىسىندا.

ونىڭ اتاپ وتۋىنشە، ۇلتتىق قور قاراجاتىن بيۋدجەتكە ترانسفەرتتەر ءبولۋ ءۇشىن كونۆەرتاسيالاۋ وپەراسيالارى، كۆازيمەملەكەتتىك سەكتور ۆاليۋتاسىن ساتۋ، ەكسپورتتاۋشىلاردىڭ بيۋدجەتكە سالىقتىق تولەمدەرى ۇلتتىق ۆاليۋتاعا قولداۋ كورسەتتى.

«فاكتورلار بالانسىنىڭ نەگاتيۆتى جاققا اۋىسۋى، نارىقتارداعى تاۋەكەل-سەنتيمەنت تەڭگەنىڭ دوللارعا شاققانداعى باعامىنىڭ اقپاندا 495 تەڭگەگە دەيىن 14،2 پايىزعا السىرەۋىنە سەبەپ بولدى. ناۋرىزدا قوسىمشا سانكسيالارعا، ونىڭ ىشىندە رەسەيدەن مۇناي ونىمدەرىن يمپورتتاۋعا اقش-تىڭ تىيىم سالۋىنا بايلانىستى رەسەي ءرۋبلىنىڭ السىرەۋى تەڭگەگە قىسىمدى كۇشەيتتى. ناۋرىزدىڭ باسىنان باستاپ 542 ملن دوللارعا ينتەرۆەنسيا جۇرگىزىلدى. بيىلعى جىلعى 14 ناۋرىزدا تەڭگە باعامى ءبىر دوللار ءۇشىن 511،74 تەڭگەنى قۇرادى»، - دەدى عالىمجان ءپىرماتوۆ.