ۋاقىتى: ساعات 9-دان 12-گە دەيىن. سەنبىلىككە 2 000-نان استام كوممۋنالدىق قىزمەت جۇمىسشىلارى مەن 400-دەن استام ارنايى تەحنيكا شىعادى.
الماتى اكىمدىگى تۇرعىنداردى 19 ناۋرىزدا Birge – taza Qazaqstan رەسپۋبليكالىق اكسياسى اياسىندا جالپىقالالىق سەنبىلىككە قاتىسۋعا شاقىرادى، دەپ حابارلايدى Almaty-akshamy.kz
قىسقى كەزەڭنەن كەيىن قالا اۋماعىن، رەكرەاسيالىق ايماقتاردى، ساياباقتاردى، سكۆەرلەردى، اۋلالاردى، سونداي-اق ساۋدا وبەكتىلەرىنە، قوعامدىق تاماقتانۋ ورىندارىنا جانە باسقا دا ۇيىمدارعا ىرگەلەس اۋماقتاردى تازارتۋ ءارى جيناۋ جوسپارلانۋدا. جاپپاي اعاش وتىرعىزۋ دا جوسپارلانعان.
بارلىق مەنشىك نىسانىنداعى ۇيىمداردىڭ باسشىلارىن، ونىڭ ىشىندە پيك، جكب باسشىلارىن قاجەت بولعان جاعدايدا سەنبىلىككە قاتىسۋشىلاردى ىرگەلەس اۋماقتار مەن اۋلالاردا قوقىس جيناۋعا ارنالعان قۇرالدارمەن، قولعاپتارمەن، قاپتارمەن قامتاماسىز ەتۋدى سۇرايمىز.
قوقىس سالىنعان قاپتاردى جول جيەگىنە قويۋ ۇسىنىلادى. ولاردى قالانىڭ كوممۋنالدىق قىزمەتتەرى الىپ كەتەدى.
قالا اۋداندارى بويىنشا سەنبىلىك وتەتىن ورىندار ءتىزىمى:
1) الاتاۋ اۋدانىندا «سوسنوۆىي بور» ەكوپاركىندە جاپپاي اعاش وتىرعىزۋ جانە ىرگەلەس جاسىل ايماقتار اۋماعىن جيناۋ جوسپارلانعان.
2) المالى اۋدانىندا سەنبىلىكتى سايران كولىنىڭ شىعىس جاعالاۋىندا جاپپاي وتكىزۋ جوسپارلانعان.
3) اۋەزوۆ اۋدانىندا – سايران كولىنىڭ باتىس جاعالاۋىندا.
4) بوستاندىق اۋدانىندا – اباي داڭعىلىنىڭ ءبولۋ جولاعىندا.
5) جەتىسۋ اۋدانىندا – گۇلدەر ساياباعىندا.
6) مەدەۋ اۋدانىندا – رەچكا كازاچكا كوشەسى «ۆوستوچكا» تك ارتىندا.
7) ناۋرىزباي اۋدانىندا – №7 قكا-نىڭ ىرگەلەس اۋماعىندا جانە اباي داڭعىلىنىڭ بويىمەن الاتاۋ داڭعىلىنىڭ شىعىسىنا قاراي.
8) تۇركسىب اۋدانىندا – پەتروزاۆودسكايا جانە مايلين كوشەلەرىندەگى جىرالاردا.