تەمىرتاۋدا ماگيسترالدىق جىلۋ قۇبىرىنداعى اپاتقا بايلانىستى مىڭداعان تۇرعىن جىلۋسىز قالدى، دەپ حابارلايدى aqshamnews.kz turkystan.kz-كە cىلتەمە جاساپ.
جاعدايدى اۋا تەمپەراتۋراسىنىڭ كۇرت تومەندەۋى قيىنداتىپ وتىر: قاراعاندى وبلىسىندا ءقازىر قاتتى اياز بايقالۋدا. بەلگىلى بولعانداي، 13 قاڭتار كۇنى كەشكە تەمىرتاۋدا قالانىڭ ءىرى تۇرعىن اۋداندارىن جىلۋمەن قامتاماسىز ەتەتىن ماگيسترالدىق جىلۋ جەلىسىندە اپات بولعان.
سونىڭ سالدارىنان 8-شاعىناۋدانداعى شامامەن 40 كوپقاباتتى ءۇي جانە وترادنوە كەنتىندەگى ونداعان جەكەمەنشىك ءۇي جىلۋسىز قالدى. سونداي-اق ءبىرقاتار كاسىپكەرلىك نىساندارى مەن الەۋمەتتىك سالا وبەكتىلەرىندە جىلۋ بەرۋ ۋاقىتشا توقتاتىلدى.
تەمىرتاۋ قالاسىنىڭ اكىمى عالىم ءاشىموۆتىڭ ايتۋىنشا، زاقىم 1970-جىلداردان بەرى كۇردەلى جوندەۋ جۇرگىزىلمەگەن قۇبىردىڭ ەسكى بولىگىندە ورىن العان.
«زاقىمدانعان ورىن انىقتالدى، ماماندار قالپىنا كەلتىرۋ جۇمىستارىنا كىرىستى. اپاتتىق-قالپىنا كەلتىرۋ بريگادالارى جۇمىس ىستەپ جاتىر، بارلىق قاجەتتى كۇش پەن تەحنيكا جۇمىلدىرىلدى. اقاۋلاردى مۇمكىندىگىنشە قىسقا مەرزىمدە جويۋ ءۇشىن جۇمىستار ۇزدىكسىز جۇرگىزىلۋدە»، — دەپ جازدى ول الەۋمەتتىك جەلىدەگى پاراقشاسىندا.
14 قاڭتار كۇنى ساعات 13:00-دەن باستاپ جوسپاردان تىس جوندەۋ جۇمىستارىن جۇرگىزۋ ءۇشىن جىلۋ جەلىسىنىڭ ءبىر بولىگى اجىراتىلدى. سونىڭ ناتيجەسىندە 8-شاعىناۋدانداعى ۇيلەر ۋاقىتشا ىستىق سۋ مەن جىلۋسىز قالدى.
سوڭعى مالىمەتتەرگە سايكەس، قازىرگى ۋاقىتتا تەمىرتاۋدا جوندەۋ جۇمىستارى تولىق اياقتالىپ، جىلۋ جەلىسىن تولتىرۋ جۇمىستارى جۇرگىزىلىپ جاتىر. جىلۋدىڭ ۇيلەرگە جەتۋىنە ءبىراز ۋاقىت قاجەت بولادى.