ق ر پرەزيدەنتىنىڭ جانىنداعى ۇلتتىق عىلىم اكادەمياسىنىڭ ۆيسە-پرەزيدەنتى، بەلگىلى قازاقستاندىق عالىم جانە قوعام قايراتكەرى، اكادەميك اسقار جۇمادىلدايەۆ كۇردەلى ماتەماتيكالىق ەسەپتەردى شەشۋدە ءال-فارابي اتىنداعى قازۇۋ سۋپەركومپيۋتەرىنىڭ قۋاتىن پايدالانادى، - دەپ حابارلايدى aqshamnews.kz.
عالىمنىڭ ايتۋىنشا، بۇرىن بىرنەشە اپتا، ءتىپتى ايلار بويى قولمەن نەمەسە جەكە كومپيۋتەر كومەگىمەن ەسەپتەلەتىن اسا كۇردەلى الگەبرالىق ەسەپتەردى قازۇۋ-دىڭ جوعارى ءونىمدى سۋپەركومپيۋتەرى قىسقا ۋاقىتتا شەشىپ بەرگەن.
«تاريحقا شولۋ جاساساق، مەن ميتتاگ-لەفلەر ينستيتۋتىندا جۇمىس ىستەگەن ۋاقىتتا كومپيۋتەرگە ەسەپتەۋ باعدارلامالارىن بەرسەك، ونىڭ ناتيجەسىن كەلەسى كۇنى عانا الاتىنبىز. سەبەبى كۇردەلى ەسەپتەردى شەشۋ ءۇشىن قۋاتتى كومپيۋتەر قاجەت. ءقازىر وزىمدە سەگىز پروسەسسوردان تۇراتىن قۋاتتى جەكە كومپيۋتەر بار، الگەبرالىق ەسەپتەرىمدى سونىڭ كومەگىمەن شىعارىپ كەلدىم. الايدا قازۇۋ سۋپەركومپيۋتەرى بۇرىن اپتالاپ ەسەپتەلەتىن كۇردەلى تاپسىرمالاردى بار بولعانى ءۇش ساعاتتا ورىنداپ بەردى. سوندىقتان بۇل وراسان زور كۇش»، – دەدى اكادەميك اسقار جۇمادىلدايەۆ.
عالىمعا قازۇۋ سۋپەركومپيۋتەر ورتالىعىنىڭ ماماندارى ارنايى ەسەپتەۋگە ارنالعان سەرۆەرلەردى ءبولىپ بەرگەن جانە عىلىمي جوبالاردى جۇزەگە اسىرۋعا جان-جاقتى قولداۋ كورسەتەدى. قازىرگى تاڭدا اسقار سەرقۇل ۇلى جوعارى تەحنولوگيالىق قۇرىلعىنىڭ كومەگىمەن باسقا دا كۇردەلى ەسەپتەردى ەسەپتەۋ باعىتىندا جۇمىس ىستەپ جاتىر.
ايتا كەتەيىك، قازۇۋ-دىڭ سۋپەركومپيۋتەرى اكادەميالىق باعىتتا ىسكە قوسىلعان العاشقى جوعارى ءونىمدى ەسەپتەۋ كەشەنى جانە مۇنداي دەڭگەيدەگى جۇيە ورتالىق ازيا وڭىرىندە كەزدەسپەيدى. ونىمدىلىگى – 2000 تەرافلوپس. الەمدەگى ۇزدىك 600 سۋپەركومپيۋتەردىڭ ءبىرى. ارحيتەكتۋراسى Intel جانە NVIDIA كومپانيالارىنىڭ پروسەسسورلارىنان قۇرالعان، قۋاتى ەڭ زاماناۋي دەربەس كومپيۋتەردەن 10 مىڭ ەسە ارتىق. بۇل جۇيە كۇردەلى ماتەماتيكالىق مودەلدەر مەن كوپولشەمدى ەسەپتەۋلەردى جوعارى دالدىكپەن ورىنداۋعا، اۋا رايىن بولجاۋعا، سونداي-اق جاساندى ينتەللەكت پەن دەرەكتەردى تەرەڭ تالداۋ باعىتىنداعى عىلىمي جانە قولدانبالى جوبالاردى ءتيىمدى جۇزەگە اسىرۋعا كەڭ مۇمكىندىك بەرەدى.