ءماجىلىس دەپۋتاتى، «AMANAT» پارتياسى فراكسياسىنىڭ جەتەكشىسى ەلنۇر بەيسەنبايەۆ قازاقستانداعى كينونارىقتىڭ قازىرگى جاعدايىنا الاڭداۋشىلىق ءبىلدىرىپ، ءبىرقاتار كينوتەاتر جەلىلەرىنىڭ مونوپوليالىق ساياسات جۇرگىزىپ وتىرعانىن مالىمدەدى.
ونىڭ ايتۋىنشا، وتاندىق كينويندۋستريانى ساناۋلى عانا «تاڭداۋلى» توپ باقىلاۋدا ۇستاپ وتىر. بۇل تۋرالى aqshamnews.kz حابارلادى.
دەپۋتاتتىڭ سوزىنشە، مەملەكەت باسشىسى قاسىم-جومارت توقايەۆ كرەاتيۆتى يندۋستريانى ەكونوميكانىڭ باسىم باعىتتارىنىڭ ءبىرى رەتىندە ايقىنداعان. الايدا كينو سالاسىنداعى قالىپتاسقان جۇيە بۇل مىندەتتەردىڭ تولىق ىسكە اسۋىنا كەدەرگى كەلتىرىپ وتىر. «AMANAT» پارتياسىنىڭ اتىنا كينو سالاسى وكىلدەرىنەن كينوتەاترلاردىڭ كاسسالىق تۇسىمدەرگە قاتىستى ادىلەتسىز تالاپتارى جونىندە كوپتەگەن شاعىم تۇسكەن.
ەلنۇر بەيسەنبايەۆ كينوتەاترلار ءفيلمنىڭ تابىستى نەمەسە تابىسسىز بولۋىنا قاراماستان، ءوز ۇلەستەرىن الدىن الا الىپ وتىرعانىن اتاپ ءوتتى. ونىڭ ايتۋىنشا، بۇل ۇلەس تازا پايدادان ەمەس، جالپى كاسسالىق تۇسىمنەن ۇستالادى. مۇنداي جاعدايدا رەجيسسەرلەر مەن پروديۋسەرلەر قىسىمنان قاۋىپتەنىپ، ماسەلەنى اشىق كوتەرە الماي وتىر. سونىمەن قاتار فيلم اۆتورلارى جارناما مەن ىلگەرىلەتۋ ءۇشىن قوسىمشا تولەمدەر جاساۋعا ءماجبۇر، ال كەيبىر جاعدايلاردا «كولەڭكەلى جارنالاردىڭ» بار ەكەنى دە ايتىلىپ وتىر.
دەپۋتاتتىڭ دەرەگىنشە، بۇل تالاپتار مەملەكەتتىك قارجى ەسەبىنەن تۇسىرىلگەن فيلمدەرگە دە قاتىستى. ماسەلەن، بيۋدجەت قاراجاتىنا تۇسىرىلگەن «QAITADAN» ءفيلمى پروكاتتا 1 ميلليارد تەڭگەدەن استام تابىس تاپقانىمەن، ونىڭ 550 ميلليون تەڭگەسى كينوتەاترلارعا كەتكەن. ال فيلم وندىرىسىنە مەملەكەت نەبارى 190 ميلليون تەڭگە بولگەن. وسىلايشا، جەكەمەنشىك كينوتەاتر جەلىلەرى مەملەكەت سالعان ينۆەستيسيادان بىرنەشە ەسە كوپ قارجىنى، ول بيۋدجەتكە قايتارىلماي تۇرىپ-اق الىپ وتىر.
ەلنۇر بەيسەنبايەۆ ەكران مەن كورەرمەن ورنىن عانا ۇسىناتىن كينوتەاترلار فيلم اۆتورلارىنا قاراعاندا الدەقايدا كوپ پايدا تاۋىپ وتىرعانىن سىنعا الدى. ونىڭ پىكىرىنشە، مۇنداي جۇيە ءفيلمنىڭ ءوزىن-وزى اقتاۋىنا كەدەرگى كەلتىرىپ، قازاقستاندىق كينويندۋستريانىڭ دامۋىن تەجەپ وتىر. سونىڭ سالدارىنان ەلىمىزدە كوبىنە كوممەرسيالىق كومەديالار ءتۇسىرىلىپ، تاريحي، مادەني جانە الەۋمەتتىك ماڭىزى بار تۋىندىلاردىڭ سانى ازايىپ كەلەدى.
دەپۋتات قازىرگى تاڭدا قازاقستاندىق كينونارىقتا پروكات شارتتارىن، ەكران سانىن، كورسەتىلىم ۋاقىتىن جانە قاي ءفيلمنىڭ كورەرمەنگە جەتەتىنىن ساناۋلى عانا كينوتەاتر جەلىلەرى انىقتايتىنىن ايتتى. ونىڭ سوزىنشە، بۇل – ءادىل باسەكەگە قايشى كەلەتىن اشىق مونوپوليالىق ساياسات.
وسىعان بايلانىستى ەلنۇر بەيسەنبايەۆ كاسسالىق ءتۇسىمنىڭ 50 پايىزىنا دەيىن الىپ وتىرعان كينوتەاتر جەلىلەرىنە قاتىستى باسەكەلەستىكتى قورعاۋ جانە دامىتۋ اگەنتتىگى مەن باسقا دا ۋاكىلەتتى ورگاندار تاراپىنان كەشەندى تەكسەرۋ جۇرگىزۋدى سۇرادى. سونداي-اق ول كينوتەاترلار فيلم وندىرىسىنە كەتكەن شىعىن تولىق وتەلمەيىنشە، كاسسالىق تۇسىمنەن ۇلەس الماۋى ءتيىس دەگەن ۇستانىمدى ءبىلدىردى.
دەپۋتات حالىقارالىق تاجىريبەنى مىسالعا كەلتىرىپ، اقش-تا پروكاتتىڭ العاشقى اپتالارىندا ستۋديالار كاسسالىق ءتۇسىمنىڭ 70–90 پايىزىنا دەيىن الاتىنىن اتاپ ءوتتى. وسى تاجىريبەنى نەگىزگە الا وتىرىپ، كينوتەاترلار، پروكاتشىلار مەن كينوستۋديالار اراسىنداعى كەلىسىمشارتتاردى قايتا قاراۋ قاجەتتىگىن جەتكىزدى.