سوت ونى ءومىر بويىنا باس بوستاندىعىنان ايىردى.
تەمىرتاۋدا 53 جاستاعى ەر ادام كامەلەتكە تولماعان وگەي قىزدارىنا سەكسۋالدىق زورلىق-زومبىلىق كورسەتكەن. سوت ونى ءومىر بويىنا باس بوستاندىعىنان ايىردى، دەپ حابارلايدى اlmaty-akshamy.kz Tengrinews.kz سىلتەمە جاساپ.
سوتتالۋشى جازاسىن توتەنشە قاۋىپسىزدىكتەگى اباقتىدا وتەيدى. بۇعان دەيىن پەدوفيل ءوزىنىڭ قىلمىسىنىڭ اۋىرلىعىن سەزىپ، قورعاۋشىسى ارقىلى جابىرلەنۋشىلەرگە اقشا بەرمەك بولعان. الايدا بالالاردىڭ اناسى مەن پروكۋرور وعان قاتاڭ جازا بەرۋىن سۇرادى.
تەرگەۋ ماتەريالدارى بويىنشا، سوتتالۋشى 14 جانە 11 جاستاعى ەكى بىردەي وگەي قىزىن قورقىتىپ، سەكسۋالدىق زورلىق-زومبىلىق ارەكەتتەرىن جاساپ كەلگەن. قىزدار بىرنەشە ايدان سوڭ انالارىنا شاعىمدانعان. بۇعان قاتىستى قىلمىستىق ءىس قوزعالىپ، 1،5 جىل بويى قارالدى. ءىس بارىسىندا پەدوفيلدىڭ بۇرىن دا سوتتالعانى انىقتالدى.
«سوتتالۋشى تەمىرتاۋدا ءوز پاتەرىنىڭ قوناق بولمەسىندە 2009، 2012 جىلى تۋعان وگەي قىزدارىنا قاتىستى سەكسۋالدىق سيپاتتاعى زورلىق-زومبىلىق ارەكەتتەرىن جاساعان. جابىرلەنۋشىلەردىڭ جاستارىن انىق بىلە تۇرا، دارمەنسىز، قارسىلىق كورسەتە المايتىندارىن ۇعىنا تۇرا، ارەكەتىن بىرنەشە رەت قايتالانعان. سوتتالۋشىنىڭ كىناسى جابىرلەنۋشىلەردىڭ، كۋالاردىڭ ايعاقتارىمەن، زاتتاي دالەلدەمەلەرمەن، ساراپتاما قورتىندىلارىمەن دالەلدەندى. ول كامەلەتكە تولماعاندارعا جىنىستىق زورلىق-زومبىلىق جاساعاندىقتان، ەشقاشان مەرزىمىنەن بۇرىن بوساتىلمايدى. ۇكىم زاڭدى كۇشىنە ەنگەن جوق»، - دەپ حابارلادى قاراعاندى وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتى.