تەمىرتاۋدا جىل سايىن اۋاعا 300 مىڭ توننادان اسا زيان زات تارايدى. ونىڭ نەگىزگى بولىگى قاراعاندى مەتاللۋرگيا كومبيناتىنا تيەسىلى. بۇل تۋرالى كليماتتىڭ وزگەرۋى مەن جاسىل ەنەرگەتيكا جونىندەگى ورتالىق ازياعا ارنالعان جوبالىق كەڭسە مالىمدەدى، - دەپ حابارلايدى aqshamnews.kz ءتىلشىسى.
تەمىرتاۋ - قازاقستانداعى ەڭ لاس قالالاردىڭ ءبىرى. حالقى 200 مىڭ ادامعا جەتپەسە دە، اۋاعا تارايتىن وندىرىستىك قالدىقتاردىڭ مولشەرى وتە جوعارى.
"تەمىرتاۋ قالاسى - قازاقستانداعى اۋا ساپاسىن ەڭ كوپ لاستايتىن ەلدى مەكەندەردىڭ ءبىرى. سوڭعى ون جىل ىشىندە قالادا اتموسفەرانىڭ "جوعارى" دەڭگەيدە لاستانۋى تۇراقتى تۇردە بايقالىپ كەلەدى. جىل سايىن تەمىرتاۋ اتموسفەراسىنا شامامەن 305 مىڭ توننا ونەركاسىپتىك شىعارىندى تارايدى، ولاردىڭ نەگىزگى بولىگى قالا قۇراۋشى كاسىپورىن - قاراعاندى مەتاللۋرگيا كومبيناتىنا تيەسىلى"، - دەلىنگەن حابارلامادا.
سالىستىرۋ ءۇشىن ايتار بولساق، ماسەلەن حالقى 2،3 ميلليوننان اساتىن الماتىدا اۋاعا 232 مىڭ توننا ونەركاسىپتىك قالدىق تارايدى.
جوبالىق كەڭسەنىڭ اقپاراتىنشا، تەمىرتاۋداعى ونەركاسىپتىك شىعارىندىلاردىڭ 80%-دان استامى "Qarmet" اق-عا تيەسىلى. زاۋىتتان اۋاعا شىعاتىن نەگىزگى زياندى زاتتار مىنالار: ازوت پەن كۇكىرت ديوكسيدتەرى، فەنول، اممياك، كومىرتەك توتىعى، كۇكىرتسۋتەك.
قازگيدرومەت مالىمەتىنشە، تەمىرتاۋدا 2015 جىلدان بەرى اۋا ساپاسى "جوعارى دەڭگەيدە لاستانعان" دەپ باعالانىپ كەلەدى. 2023 جىلى زياندى زاتتار شەكتى نورمادان 5 879 رەت، 2024 جىلى 1 414 رەت اسىپ كەتكەن.