تەمىرجولدى كەسىپ وتپە!

55 ازامات پويىزدىڭ استىنا ءتۇسىپ، ولاردىڭ جارتىسىنان كوبى قايتىس بولدى.

ەلىمىزدە تەمىرجولدى بەلگىلەنبەگەن تۇستان كەسىپ وتكەن 28 مىڭنان استام ازامات جاۋاپقا تارتىلدى، دەپ حابارلايدى aqshamnews.kz

جىل باسىنان بەرى كولىكتەگى پوليسيا دەپارتامەنتى بەلگىلەنبەگەن جەرلەردەن تەمىرجولداردى كەسىپ وتكەنى ءۇشىن 28 589 تۇلعانى اكىمشىلىك جاۋاپكەرشىلىككە تارتتى.

ونىڭ ىشىندە ادامداردىڭ بولۋىنا بايلانىستى – 205، جانۋارلاردىڭ بولۋىنا بايلانىستى – 956.

دەپارتامەنت باستىعى باقىتجان مالىبايەۆتىڭ ايتۋىنشا، دەمالىس كۇندەرى جەتىسۋ وبلىسى قارابۇلاق – تالدىقورعان ارالىعىندا جۇك پويىزى بەلگىلەنبەگەن جەردەن تەمىر جولدى كەسىپ ءوتىپ بارا جاتقان ەر ادامدى قاعىپ كەتتى.

ول العان جاراقاتتارىنان سول جەردە كوز جۇمدى. قىلمىستىق ءىس قوزعالىپ، تەرگەۋ جۇرگىزىلۋدە.

"وكىنىشكە وراي، قايعىلى وقيعالاردىڭ كوپشىلىگى تەمىرجولدا ءجۇرىپ-تۇرۋ ەرەجەلەرىن ساقتاماۋ سالدارىنان بولادى. ءالى كۇنگە دەيىن ادامدار تەمىرجولدىڭ قانشالىقتى ءقاۋىپتى ايماق ەكەندىگىن، ونىڭ زارداپتارىن جەتە تۇسىنبەيدى"، – دەدى ب.مالىبايەۆ.

كولىك پوليسەيلەرى پروفيلاكتيكالىق ءىس-شارالاردى جۇرگىزۋ كەزىندە ازاماتتارعا تەمىرجول ايماعىندا قاۋىپسىزدىك ەرەجەلەرىن قاتاڭ ساقتاۋ قاجەت ەكەنىن ءجيى ەسكەرتەدى.

جاياۋ جۇرگىنشىلەردىڭ توسەم ارقىلى وتپەس بۇرىن تەمىرجولدا پويىزدىڭ، لوكوموتيۆتىڭ نەمەسە ۆاگونداردىڭ جوقتىعىنا ابدەن كوز جەتكىزگەندەرى ءجون. ءتىپتى، پويىزدىڭ سيگنالىن ەستۋ ءۇشىن قۇلاققاپ پەن باس كيىمدى شەشىپ ءوتۋ وتە ماڭىزدى.