ق ر دەنساۋلىق ساقتاۋ مينيسترلىگىندە وبلىستار اكىمدەرىنىڭ، دەنساۋلىق ساقتاۋ باسقارمالارىنىڭ وڭىرلىك جانە مينيسترلىكتىڭ قۇرىلىمدىق بولىمشەلەرى باسشىلارىنىڭ قاتىسۋىمەن كەزەكتى القا وتىرىسى ءوتتى.
القا وتىرىسى بارىسىندا دەنساۋلىق ساقتاۋ جۇيەسىنىڭ وسى جىلدىڭ العاشقى جارتىجىلدىعىنداعى جۇمىسى قورىتىندىلاندى، دەپ حابارلايدى ashamnews.kz دەنساۋلىق ساقتاۋ مينيسترلىگىنە سىلتەمە جاساپ.
جيىندا ونكولوگيا قىزمەتىن جاقسارتۋ، مەديسينالىق ۇيىمداردىڭ قارجىلىق تۇراقتىلىعىن ارتتىرۋ بويىنشا جوسپاردى جۇزەگە اسىرۋ شارالارى، سونىمەن قاتار مەديسينالىق جوو ستۋدەنتتەرىنىڭ ءبىلىمىن باعالاۋ مەن وقىتۋدىڭ جاڭا تاسىلدەرى قارالدى.
سونداي-اق مەملەكەتتىك مەكەمەلەر ۇسىناتىن، حالىقتىڭ مەديسينالىق كومەك ساپاسىنا قاناعاتتانۋىنا باعىتتالعان جوعارى اۋديتورلىق پالاتاعا جۇرگىزىلگەن شولۋ تانىستىرىلدى.
دەنساۋلىق ساقتاۋ مينيسترلىگىنىڭ 2023-2027 جىلدارعا ارنالعان دامۋ جوسپارىنىڭ 30-دان استام ينديكاتورىنىڭ ورىندالۋ ناتيجەلەرى تالقىلاندى، ولاردىڭ جارتىسى وڭىرلىك اكىمدىكتەرمەن بىرلەسە جۇزەگە اسىرىلۋدا. شۇعىل گوسپيتاليزاسيا ءوسىمى مەن مەديسينالىق ستاتيستيكا قۇرۋ ادىستەرىنە تالداۋ جۇرگىزۋ، حالىقتىڭ دەنساۋلىعىن ساقتاۋداعى نەگىزگى كورسەتكىشتەرگە قول جەتكىزۋ بويىنشا وڭىرلەرمەن جۇمىستى كۇشەيتۋ تاپسىرىلدى.
پروفيلاكتيكانىڭ جەتكىلىكسىزدىگى، اقپاراتتىق جۇيەلەردى بىرىكتىرۋدەگى كەدەرگىلەر جانە كادر تاپشىلىعى سىندى ونكولوگيالىق قىزمەت جۇمىسىنداعى ماسەلەلەر ءبولىپ كورسەتىلدى. وسى كەمشىلىكتەردى جويۋ ماقساتىندا ونكوقىزمەتتى جەتىلدىرۋ بويىنشا 2024-2027 جىلدارعا ارنالعان جول كارتاسى ازىرلەندى، ول ۇيىمداستىرۋشىلىق ۇدەرىستەردى جاڭعىرتۋ جانە قارجىنى ءتيىمدى جۇمساۋدى قامتيدى.
سونىمەن قاتار كادر تاپشىلىعى ماسەلەسىن شەشۋگە جانە مەديسينالىق جوو-داعى ءبىلىم ساپاسىن ارتتىرۋعا ارنالعان جاڭا باستامالار ۇسىنىلدى. تۇلەكتەردى بولگەندە جەرگىلىكتى اتقارۋشى ورگاندار قاجەتتىلىگى مەن كادرلىق رەسۋرستار بولجامى ەسكەرىلەدى. بۇكىل رەزيدەنتۋرا ۇدەرىسىن ۇيلەستىرۋ ءۇشىن ساندىق پلاتفورما قۇرىلادى.
وتىرىس قورىتىندىسىندا كەشەندى جوسپار شەڭبەرىندە مەديسينالىق ۇيىمداردىڭ قارجىلىق جاعدايىن جاقسارتۋ بويىنشا جۇمىستاردى جالعاستىرا بەرۋ تاپسىرىلدى. جىلدىڭ سوڭىنا دەيىن اناعۇرلىم پروبلەمالى 30 مەديسينالىق ۇيىمدى باقىلاۋ جانە قولداۋعا ەرەكشە كوڭىل بولىنەتىن بولادى. باسىمدىق بەرىلەتىن ماسەلەلەر قاتارىندا - مەملەكەتتىك مىندەتتەمەلەردىڭ رەسۋرستارعا قاتىستى تەڭگەرىمىن ساقتاۋ، قارجىنى ءتيىمدى جۇمساۋدى ارتتىرۋ جانە باسشىلىق قىزمەتتەرگە كادر ىرىكتەۋدى كۇشەيتۋ جۇمىستارى بار.
ءبىر ايتا كەتەرلىگى، 2024 جىلدىڭ التى ايىندا 1،6 ميلليون ناۋقاس ستاسيونارلىق كومەك العان، 200 مىڭعا جۋىق ايەل بوساندىرىلعان، سونداي-اق جادەل جاردەم قىزمەتى 4،2 ميلليوننان استام شاقىرتۋعا جاۋاپ بەرگەن. بۇل دەرەكتەر دەنساۋلىق ساقتاۋ جۇيەسى جۇمىسىنىڭ كولەمىن عانا ەمەس، سونىمەن بىرگە مەديسينا قىزمەتكەرلەرى ەڭبەگىنىڭ ماڭىزدىلىعىن دا كورسەتەدى.
مينيسترلىك دەنساۋلىق ساقتاۋ جۇيەسىن جاقسارتۋ، ساپالى مەديسينالىق كومەكپەن قامتاماسىز ەتۋ جانە سالانىڭ بارلىق قىزمەتكەرلەرىنە وزىق ەڭبەك جاعدايىن جاساۋ بويىنشا جۇمىستارىن جالعاستىرا بەرەدى. مەديسينالىق مەكەمەلەرمەن، وڭىرلەرمەن جۇمىستى ۇيلەستىرۋگە جانە ولاردى قولداۋعا ەرەكشە كوڭىل بولىنەتىن بولادى. دەنساۋلىق ساقتاۋ ءمينيسترى وتىرىستىڭ بارلىق قاتىسۋشىلارىن ورتاق ماقساتقا جەتۋدە جانە ازاماتتارعا ارنالعان مەديسينالىق قىزمەت ساپاسىن ارتتىرۋدا كۇش بىرىكتىرە جۇمىس ىستەۋگە شاقىردى.