بيىل 6000-نان استام ازامات بەلگىلەنبەگەن جەردەن تەمىر جول توسەمىن كەسىپ وتكەن.
سول ءۇشىن جاۋاپكەرشىلىككە تارتىلعان، دەپ حابارلايدى Almaty-akshamy.kz Polisia.kz-كە سىلتەمە جاساپ.
وتكەن اپتادا كولىكتەگى پوليسيا دەپارتامەنتى پويىزداردىڭ ادامداردى قاعىپ كەتۋدىڭ 5 فاكتىسىن تىركەدى. جازاتايىم وقيعالار سولتۇستىك قازاقستان، جامبىل، تۇركىستان، قىزىلوردا جانە اقتوبە وبلىستارىنىڭ اۋماعىندا بولدى. ءۇش فاكتى بويىنشا ادامدار تەمىرجول جاراقاتىن السا، ەكەۋى ولىممەن اياقتالدى.
بۇل تۋرالى دەپارتامەنت باستىعىنىڭ ءبىرىنشى ورىنباسارى ماديار ايتۋعانوۆ مالىمدەدى. ونىڭ ايتۋىنشا، كولىكتەگى پد قىزمەتكەرلەرى تەمىرجول توسەمىندە جاراقات الۋ مەن جازاتايىم وقيعالاردىڭ الدىن الۋ ماقساتىندا تۇرعىندارمەن جانە وقۋ ورىندارىنىڭ وقۋشىلارىمەن تۇراقتى نەگىزدە كەزدەسۋلەر وتكىزىپ تۇرادى. قابىلدانىپ جاتقان شارالاردىڭ ناتيجەسىندە وسى كەزەڭدە دەپارتامەنتتە جىلجىمالى قۇرامنىڭ بالالاردى قاعىپ كەتۋدىڭ بىردە-بىر فاكتىسى تىركەلگەن جوق. دەسەك تە، كەيبىر ازاماتتار تەمىرجول كولىگى وبەكتىلەرىندەگى قاۋىپسىزدىك ەرەجەلەرىن بۇزۋدى جالعاستىرۋدا، ال ونىڭ سوڭى اۋىر زارداپتارعا اكەپ سوعادى.
«وسى جىلدىڭ باسىنان بەرى تەمىرجول كولىگىندەگى قاۋىپسىزدىك ەرەجەلەرىن بۇزۋدىڭ، ياعني ازاماتتاردىڭ بەلگىلەنبەگەن جەرلەردەن تەمىرجولدى كەسىپ ءوتۋدىڭ 6179 فاكتىسى انىقتالدى. سونداي-اق تەمىرجولدا ادامداردىڭ، ءۇي جانۋارلارىنىڭ بولۋىنا جانە بوگدە زاتتاردى قويۋعا بايلانىستى پوەزداردا شۇعىل تەجەۋدى قولدانۋدىڭ 280-نەن استام فاكتىسى تىركەلدى. تەمىرجولداعى قاۋىپسىزدىك تاقىرىبى وتە وزەكتى ماسەلە. ازاماتتار كوبىنەسە، اسپالى كوپىرلەردەن وتپەي، جولدى قىسقارىپ، ۋاقىتتى ۇنەمدەگىسى كەلەدى. مۇنىڭ سوڭى تەمىرجول جاراقاتىن الۋعا نەمەسە ادام ءولىمى جاعدايلارىنا اكەپ سوعادى. سوندىقتان ءبىر مينۋتتى ۇنەمدەيمىن دەپ ءومىرىڭىزدى قىسقارتىپ الماڭىز. ەڭ باستىسى، بىرنەشە قاراپايىم ەرەجەلەردى ەستە ساقتاعان ءجون:«تەمىرجول جاياۋ جۇرگىنشىلەرگە ارنالعان جول ەمەس!»،«تەمىرجول ويىن الاڭى ەمەس!»، «تەمىرجول – اسا ءقاۋىپتى ايماق!»، – دەدى م. ايتۋعانوۆ.