قازاقستان رەسپۋبليكاسى ءىىم ۇلتتىق ۇلانى «وڭتۇستىك» وڭىرلىك قولباسشىلىعىنىڭ جاۋىنگەرلەرى قازاق ەلىنە تانىمال سپورتشى، رەكوردسمەن تەمىر سپاتايەۆپەن جۇزدەستى. كۇش ەكستريمى بويىنشا بىرنەشە دۇركىن رەكورد يەسىمەن كەزدەسۋدى قولباسشىلىقتىڭ تاربيە جانە الەۋمەتتىك-قۇقىقتىق جۇمىستار باسقارماسى وكىلدەرى ۇيىمداستىردى.
ۇلتتىق ۇلاننىڭ 3660 اسكەري بولىمىندە وتكەن ءىس-شاراعا 250-دەن اسا سارباز قاتىستى. تەمىر سپاتايەۆتىڭ سپورتتا جۇرگەنىنە 30 جىلعا جۋىقتاعان. ول كەزدەسۋ بارىسىندا بيىك بەلەستەردى تەك ەرەن ەڭبەكتىڭ ارقاسىندا باعىندىرعانىن ايتتى. ساربازداردىڭ دەنەنى شىنىقتىرۋ جانە مورالدىق دايىندىعىنىڭ ماڭىزدىلىعىن تالقىلاپ، مىقتى تۇلعا بولىپ قالىپتاسۋداعى ءپاتريوتيزمنىڭ ءرولىن اتاپ ءوتتى. سونداي-اق ارماندارعا جەتۋدىڭ جولدارىمەن ءبولىسىپ، قۇقىقتىق ءتارتىپ اسكەرى جاۋىنگەرلەرىن سالاۋاتتى ءومىر سالتىن ۇستانۋعا شاقىردى.
تەمىر سپاتايەۆتىڭ كۇش ەكستريمى بويىنشا كاسىبي تۇردە اينالىسىپ، رەكورد ورناتىپ جۇرگەنىنە جەتى جىلداي بولعان.
– سپورتتى جانىم سۇيەدى. ماقساتىم – وسى سپورت ءتۇرىن ەلگە، الەمگە تانىتىپ، جاستار اراسىندا ناسيحاتتاۋ. وسكەلەڭ ۇرپاقتى شىڭداپ، ءبىلىمدى ەتىپ، پاتريوتتىق سەزىمىن وياتقىم كەلەدى. سوندىقتان وقۋشىلارمەن جانە قازاق اسكەرىندەگى ساربازدارمەن وسىلاي ءجيى كەزدەسىپ ءجۇرمىن. ارينە، اينالىسىپ جۇرگەن ءىسىمدى ءوزىم عانا بىلسەم دەگەن وي جوق. قازاقتىڭ ءار بالاسى مىقتى بولسىن. ءبىز باتىر بابالارىمىزدىڭ ۇرپاعى ەكەنىمىزدى ۇمىتپاۋىمىز كەرەك، – دەيدى كۇش ەكستريمى بويىنشا رەكوردسمەن تەمىر سپاتايەۆ.
كەزدەسۋ كەزىندە قارا كۇش يەسى اسكەري قىزمەتشىلەر اراسىندا بەلتەمىرگە تارتىلۋ، گىر تاسىن كوتەرۋ، سالماعى 25 كەلى بولاتىن بولات قىلىشتى ءبىر قولىمەن تىكە ۇستاپ تۇرۋ سەكىلدى جارىستار ۇيىمداستىردى. جاقسى ناتيجە كورسەتكەن ۇلاندىقتارعا الىپتار سايىسى برەندى بەينەلەنگەن فۋتبولكالار تارتۋ ەتتى.
اسكەري قىزمەتتەگى نازىك جاندى ارۋلار اراسىندا دا بولات قىلىشتى ءبىر مينۋتتان اسا كوتەرگەن لەيتەنانت ءاليا ابدىعالييەۆاعا تەمىر شەگەنى ءيىپ جۇرەك ءپىشىنىن جاساپ، سىيلادى.
ايتا كەتەيىك، تەمىر سپاتايەۆ حالىق اراسىندا «تەمىر ادام» دەگەن لاقاپ اتپەن تانىمال. ول ارمرەستلينگتەن حالىقارالىق دەڭگەيدەگى سپورت شەبەرى، ازيا چەمپيونى، باۋىرجان مومىش ۇلى اتىنداعى «نامىس» توسبەلگىسىنىڭ يەگەرى. ماس-رەستلينگتەن الەم چەمپيوناتىنىڭ جۇلدەگەرى. سونىمەن قاتار، ول «تولاعاي» ۇلتتىق سپورت فەدەراسياسىنىڭ نەگىزىن قالاۋشى.