قازاقستاندىقتارعا دەرەكتەردىڭ ۇرلانۋى تۋرالى كەزەكتى ەسكەرتۋ جاسالدى.
كيبەرشابۋىلداردى تالداۋ جانە تەرگەۋ ورتالىعى (TSARKA) 2022 جىلدان 2023 جىلعا دەيىن جۇمىس ىستەگەن BreachForums حاكەرلىك فورۋمىنان قازاقستاندىقتاردىڭ دەرەكتەرىنىڭ تارالىپ كەتۋىن بايقادى، دەپ حابارلايدى aqshamnews.kz
ورتالىقتىڭ 2024 جىلدىڭ 29 شىلدەسىندەگى اقپاراتقا سۇيەنسەك، وتكەن اپتادا Telegram-دا دەرەكتەردىڭ جوعالىپ كەتۋى انىقتالعان. پايدالانۋشىلاردىڭ ءبىرى جەلىگە BreachForums حاكەرلىك فورۋمىنىڭ تولىق دەرەكقورىن ورنالاستىردى.
2022 جىلدان 2023 جىلعا دەيىن جۇمىس ىستەگەن بۇل فورۋم زياندى باعدارلامالىق جاساقتاما جانە ۇرلانعان دەرەكتەر ساۋداسى سالاسىنداعى قىزمەتىمەن تانىمال بولدى. 2023 جىلى وسى فورۋمنىڭ اكىمشىسى قاماۋعا الىندى.
سونداي-اق جاريالانعان حابارلامادا حاكەرلىك فورۋمدا قازاقستاننان بارلىعى 15 حاكەر تىركەلگەنى ايتىلدى.
"كەيبىر مالىمەتتەر بويىنشا، بۇل دەرەكتەر رەسۋرستىڭ بۇرىنعى اكىمشىسى – كونور برايان ءفيسپاتريدىڭ دەرەكقورىنىڭ ساقتىق كوشىرمەسىنەن الىنعان " دەدى TSARKA Group نەگىزىن قالاۋشى ولجاس ساتييەۆ.
بۇعان دەيىن كيبەرالاياقتار 1 جىل ىشىندە امەريكالىقتاردىڭ 10 ملرد دوللارىن ۇرلاعانى حابارلانعان بولاتىن.