ءىىم ەسىرتكى تاراتۋعا قاتىسى بار قىلمىستىق توپتارعا توسقاۋىل قويدى.
الماتى جانە سەمەي قالالارىندا كاننابيس توبىنىڭ ەسىرتكى زاتتارىن ساتۋمەن اينالىسقان الماتىلىق تۇرعىندار ۇستالدى، دەپ حابارلايدى Almaty-akshamy.kz
ەسىرتكىنى بايلانىسسىز تاسىلمەن تاراتۋعا ماماندانعان ۇيىمداسقان قىلمىستىق توپتار باتىس قازاقستان، اباي وبلىستارىندا جانە الماتى قالاسىندا قۇرىقتالدى.
گاشيش پەن ماريحۋانانى ساتۋ Telegram قوسىمشاسى ارقىلى جۇزەگە اسىرىلعان. توپتى ۇيىمداستىرۋشى چات قۇرىپ، وندا گاشيش پەن ماريحۋانانىڭ ءارتۇرلى سورتتارىنىڭ قۇنى تۋرالى اقپارات سالىپ وتىرعان. توپتىڭ باسقا مۇشەلەرى وزدەرىنە ءتيىستى قىلمىستىق رولدەرگە سايكەس ەسىرتكىنى زاڭسىز ساقتاۋمەن، دوزالارعا بولۋمەن، ولاردى الماتى مەن سەمەي اۋماعىندا تاسىمالداۋمەن جانە جاسىرۋمەن اينالىسقان.
قىلمىستىق توپقا قاتىسۋشىلار قاماۋعا الىنىپ، ۇيىمداستىرۋشىعا ىزدەۋ جاريالاندى. جالپى ءبىر كيلوگرامنان استام گاشيش تاركىلەندى. ورال قالاسىندا تاعى ءبىر قىلمىستىق توپ ۇستالدى. كۇدىكتىلەر كاننابيس توبىنىڭ ەسىرتكىسىن ساتۋمەن اينالىسقان.
ولاردان 540 گرامم گاشيش تاركىلەندى. توپتى ۇيىمداستىرۋشى Telegram مەسسەندجەرىندە ينتەرنەت-دۇكەن قۇرىپ، ەسىرتكى ساتۋعا باسشىلىق ەتكەن. ەسىرتكىنى وتكىزۋ ينتەرنەت-دۇكەننىڭ اكىمشىسى جانە جالدامالى ەسىرتكى جاسىرۋشىلار ارقىلى جۇزەگە اسىرىلعان.
جىل باسىنان بەرى ءىىم ەسىرتكى قىلمىسىنا قارسى ءىس-قيمىل بولىنىستەرىنىڭ قىزمەتكەرلەرى بارلىعى 20 ەسىرتكى زەرتحاناسىن جويدى، ونىڭ ىشىندە سەگىزىندە سينتەتيكالىق ەسىرتكى ازىرلەنگەن. ولاردان پايدالانۋعا دايىن 129 كگ سينتەتيكالىق ەسىرتكى جانە 390 كگ پرەكۋرسور تاركىلەندى.
سونىمەن قاتار 12 فيتولابوراتوريا انىقتالىپ، ولاردان 34،5 كگ كاننابيس توبىنىڭ ەسىرتكىسى تاركىلەندى. بيىل پوليسيا التى ۇيىمداسقان قىلمىستىق توپتىڭ جولىن كەستى.