«قازاقتەلەكوم» اق مەن قاتار ەلىنىڭ Power International Holding W.L.L. كومپانياسى «مت-س» ساتىپ الۋ شارتتارىن ايقىندايتىن قاعيداتتار تۋرالى كەلىسىمگە قول قويدى، دەپ حابارلايدى اlmaty-akshamy.kz «قازاقتەلەكوم» اق-نىڭ كوممۋنيكاسيالار دەپارتامەنتىنە سىلتەمە جاساپ.
قازاقستاننىڭ ءىرى تەلەكوممۋنيكاسيالىق وپەراتورى «قازاقتەلەكوم» ءوزىنىڭ ءموبيلدى اكتيۆتەرىنىڭ ءبىرى – «موبايل تەلەكوم-سەرۆيس» ج ش س (Tele2/ALTEL برەندتەرى) تاياۋ شىعىستىڭ جەتەكشى كونگلومەراتى – قاتارلىق Power International Holding-كە ساتۋدى كوزدەپ وتىر. قاعيداتتار تۋرالى ءۇش جاقتى كەلىسىمگە («سامۇرىق-قازىنا» اق) تاراپتار قازاقستان پرەزيدەنتىنىڭ قاتار ەلىنە رەسمي ساپارى شەڭبەرىندە قول قويىلدى.
«كەلىسسوزدەردى جاقىندا عانا باستادىق، ارينە، بۇگىن Power International Holding كومپانياسىمەن الدىن-الا كەلىسىمگە كەلدىك، الداعى ۋاقىتتا ساتۋ-ساتىپ الۋدىڭ بارلىق شارتتارى مەن راسىمدەرىن تالقىلاپ، بەكىتۋ قاجەت بولادى، سوندىقتان ناقتى سان، مامىلە سوماسى جانە ت. ب. تۋرالى ايتۋعا ءالى ەرتە. ءبىز ستراتەگيالىق ينۆەستور رەتىندە Pih سياقتى بەدەلدى جانە تۇراقتى كومپانيانىڭ نيەت بىلدىرگەنىنە ريزامىز، ونىڭ ۇستىنە كومپانيا قازاقستاندا ايگىلى بولىپ تابىلادى، ەلىمىزدە حولدينگتىڭ كوپتەگەن جوبالارى بار، ءارى ولاردىڭ بارلىعى ايتارلىقتاي تابىستى»، - دەپ اتاپ ءوتتى «قازاقتەلەكوم» اق باسقارما ءتوراعاسى قۋانىشبەك ەسەكەيەۆ.
Power International Holding – بۇل ەكونوميكانىڭ ءتۇرلى سەكتورلارىن قامتيتىن كاتار كونگلومەراتى. كومپانيادا 65 مىڭعا جۋىق قىزمەتكەر جۇمىس ىستەيدى، الەم بويىنشا 1000-عا جۋىق ءتۇرلى جوبالار ىسكە اسىرىلۋدا. ماسەلەن، 2022 جىلدىڭ قازان ايىندا كاتار ءامىرىنىڭ قازاقستانعا رەسمي ساپارى اياسىندا حولدينگ استانادا قۇنى 300 ميلليون دوللارعا جۋىق ءىرى حالىقارالىق مەديسينالىق كەشەن سالۋ تۋرالى مەموراندۋمعا قول قويعان بولاتىن.
«ءبىز قازاقستاندا ۇيالى بايلانىس وپەراتورىن ساتىپ الۋ تۋرالى كەلىسىمگە قول قويعانىمىزعا، ءارى ينۆەستيسيالىق احۋالى وتە قولايلى جانە ىسكەرلىك ورتا دامىعان ءسىزدىڭ ەلىڭىزدە Pih بيزنەسىن كەڭەيتىپ جاتقانىمىزعا وتە قۋانىشتىمىز» - دەدى Power International Holding W. L. L. ءتوراعاسى مۇحاممەد مۋتاز ءال-حاييات.
ەسكە سالساق، 2019 جىلى «قازاقتەلەكوم» «مت-س» -تىڭ 100% ۇلەسىن يەلەنگەن بولاتىن. بۇگىندە بۇل قازاقستانداعى ەڭ ءىرى ۇيالى بايلانىس وپەراتورى، ونىڭ تەلەكوم-قىزمەتتەرى مەن سيفرلىق سەرۆيستەرىن 7 ميلليونعا جۋىق ادام پايدالانادى. كومپانيا كونسورسيۋمعا قاتىسۋشىلاردىڭ ءبىرى بولىپ تابىلادى، ول ءبىزدىڭ ەلىمىزدە بەسىنشى بۋىن بايلانىس ستاندارتىن ورىستەتۋ جوباسىن ىسكە اسىرۋدا، ءارى بىلتىر عانا رەسپۋبليكانىڭ 20 شاقتى قالاسىندا 800-گە تارتا 5G بازالىق ستانسياسىن سالدى، بازالىق ستانسيالاردىڭ جالپى سانى 7 مىڭنان اسادى.