ۇكىمەت وتىرىسىندا وقۋ-اعارتۋ ءمينيسترى عاني بەيسەمبايەۆ تەحنيكالىق جانە كاسىپتىك ءبىلىم بەرۋدى ترانسفورماسيالاۋ ماسەلەسىنە توقتالىپ ءوتتى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
مەملەكەت باسشىسى قازاقستان حالقىنا جولداۋىندا 2025 جىلدى «جۇمىسشى ماماندىقتار جىلى» دەپ جاريالاعان بولاتىن.
عاني بەيسەمبايەۆتىڭ ايتۋىنشا، وندىرىسكە جاڭا تەحنولوگيالاردى ينتەنسيۆتى تۇردە ەنگىزۋ بىلىكتى كادرلارعا سۇرانىستى ارتتىرىپ، ماماندارعا قويىلاتىن تالاپتاردى ايتارلىقتاي وزگەرتتى. وسىلاردى ەسكەرە وتىرىپ، ۆەدومستۆو تەحنيكالىق جانە كاسىپتىك ءبىلىم بەۋ جۇيەسىن دامىتۋ بويىنشا جاڭا تاسىلدەردى ازىرلەدى. ءبىرىنشى كەزەكتە كوللەدجدەردى وڭىرلەردىڭ ەكونوميكاسىنا قاراي بەيىندەۋ جۇرگىزىلەدى.
«بۇنى ىسكە اسىرۋ ءۇشىن وڭىرلەر ەكونوميكاسىنىڭ قۇرىلىمىنا تالداۋ جۇرگىزىلدى. ونىڭ قورىتىندىسى بويىنشا مەملەكەتتىك ورگاندارمەن بىرلەسە وتىرىپ، ءتورت ماكرووڭىر جانە ولاردىڭ دامۋ باعىتتارى ايقىندالدى. وسى باعىتتاردى ەسكەرە وتىرىپ، وڭىرلەردىڭ فوكۋسىن تەحنيكالىق جانە كاسىپتىك بىلىمگە باعىتتاۋ ءۇشىن كوللەدجدەردى بەيىندەۋ جۇمىستارى باستالدى. بۇگىنگى تاڭدا وڭىرلەردىڭ ەكونوميكاسى قۇرىلىمدارىنا سايكەس 195 كوللەدج قايتا بەيىندەلدى»، - دەپ اتاپ ءوتتى مينيستر.
وسىلايشا، ەلىمىزدەگى جۇمىس كۇشىنىڭ ۇشتەن بىرىنەن استامى شوعىرلانعان قازاقستاننىڭ وڭتۇستىك ايماقتارىندا وندىرىستەردى لوكاليزاسيالاۋ جانە ينفراقۇرىلىمدى دامىتۋ جۇرۋدە. ورتالىق جانە شىعىس وبلىستاردا كادرلاردىڭ سالاارالىق جانە ءوڭىرارالىق اۋىسۋىن قامتاماسىز ەتۋ ءۇشىن ودان ءارى يندۋستريالاندىرۋ جوسپارلانۋدا. سولتۇستىك وڭىرلەردە اگرارلىق سەكتور قارقىندى جۇزەگە اسىرىلىپ جاتسا، باتىستا – ءىرى كومپانيالاردىڭ اينالاسىندا جاڭا وندىرىستەر قۇرىلۋدا.