قاۋلى جوباسى 22 مامىرعا دەيىن قوعام تالقىلاۋىندا بولادى
«اشىق نقا» پورتالىندا الماتى قالاسىندا تىركەلگەن قازاقستان ازاماتتارىنىڭ جەكەلەگەن ساناتتارىنا امبۋلاتوريالىق ەمدەۋ كەزىندە تەگىن مەديسينالىق كومەكتىڭ كەپىلدىك بەرىلگەن كولەمىن، ونىڭ ىشىندە دارىلىك زاتتاردى، ەمدىك ونىمدەردى تەگىن بەرۋ تۋرالى شەشىمىنە تولىقتىرۋلار ەنگىزۋ جوباسى جاريالاندى، دەپ حابارلايدى اlmaty-akshamy.kz.
بۇل قۇجات «تەگىن مەديسينالىق كومەكتىڭ كەپىلدىك بەرىلگەن كولەمى شەڭبەرىندەگى دارىلىك زاتتار» بولىمىنە ءبىرقاتار ءدارىنى ەنگىزۋدى كوزدەيدى.
اتاپ ايتقاندا:
- توسيليزۋماب – اورتا دوعاسى سيندرومىن (تاكاياسۋ) ەمدەۋگە؛
- ازاسيتيدين – ميەلوديسپلاستيكالىق سيندرومدى ەمدەۋگە؛
- ەۆەروليمۋس – تۋبەروزدى سكلەروزدى ەمدەۋگە؛
- ينفليكسيماب – كرون اۋرۋىن ەمدەۋگە؛
- فينلەپسين رەتارد – سانانىڭ بۇزىلۋىمەن جانە ەكى جاقتى تونيكالىق-كلونيكالىق ۇستامالارمەن فوكالدى ۇستامالارى بار سيمپتوماتيكالىق فوكالدى ەپيلەپسيانى ەمدەۋگە؛
- دەنوزۋماب – وستەوپوروزعا؛
- ەكۋليزۋماب – ۇستامالى گەموگلوبينۋرياعا (تۇنگى)؛
- ليەۆەتيراسەتام – كريپتوگەندى وشاقتى ەپيلەپسياعا؛
- اناكينرا – ستيللا اۋرۋىن ەمدەۋگە؛
- سيترۋللينا مالات، ۋبيدەكارەنون – MELAS سيندرومىن ەمدەۋگە.
الماتى قالالىق قوعامدىق دەنساۋلىق ساقتاۋ دەپارتامەنتىنەن تۇسىندىرگەندەي، جەرگىلىكتى وكىلدى ورگاندار تەگىن مەديسينالىق كومەكتىڭ كەپىلدىك بەرىلگەن كولەمىن قوسىمشا ۇسىنۋ تۋرالى شەشىم قابىلدايدى.
«قازاقستان رەسپۋبليكاسى ازاماتتارىنىڭ جەكەلەگەن ساناتتارىنا امبۋلاتوريالىق ەمدەۋ كەزىندە تەگىن مەديسينالىق كومەكتىڭ كەپىلدىك بەرىلگەن كولەمىمەن، ونىڭ ىشىندە دارىلىك زاتتاردى، ارنايى ەمدىك ونىمدەردى، مەديسينالىق بۇيىمداردى قوسىمشا قامتاماسىز ەتۋدى كوزدەيتىن الماتى قالاسى ءماسليحاتى شەشىمىنىڭ جوباسى ازىرلەندى»، - دەپ جازىلعان كەلىسىم ماتىنىندە.
قاۋلى جوباسى 22 مامىرعا دەيىن قوعام تالقىلاۋىندا بولادى.