تەاتردا تەك قانا جاستار وينايدى

«اعىن» اتتى الەم دراماتۋرگياسى تەاترى اشىلدى.

جاڭا ونەر ورداسىنىڭ ەرەكشەلىگى – ساحنادا تەك 18 بەن 28 جاس ارالىعىنداعى جاس اكتەرلار وينايدى، دەپ حابارلايدى Almaty-akshamy.kz.

ولار - تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەكتەرى. رەپەرتۋاردا  قازاق جانە الەم جازۋشىلارى مەن دراماتۋرگتەرىنىڭ شىعارمالارى بار. اتاپ ايتقاندا، مۇحتار اۋەزوۆ، روللان سەيسەنبايەۆ، ۋيليام سارويان، گەنري ميللەر، ەۆگەنيي پوپوۆ، گابريەل گارسيا ماركەستىڭ شىعارمالارى ساحنالانادى. قويىلىمدار مەملەكەتتىك تىلدە قويىلادى، سونداي-اق، كورەرمەندەردىڭ سۇراۋى بويىنشا سۋبتيترلەر بەرىلەدى.

ونەر وشاعىنىڭ شىمىلدىعى «نامىس» سپەكتاكلىمەن اشىلدى. جازۋشى روللان سەيسەنبايەۆتىڭ شىعارماسىنىڭ جەلىسىمەن ساحنالانعان قويىلىمدا قازاق- جوڭعار سوعىسىندا قول باستاعان قازاق باتىرى كۇشىكباي تۋرالى تەرەڭ سىرعا تولى شىندىق ايتىلادى.

«بۇل - مەنىڭ تەاترداعى دەبيۋتىم. "نامىس" دەگەن سپەكتاكلدە كۇشىكباي دەگەن باتىردى سومدايمىن. كۇشىكباي باتىر - 20 جاسار جاس باتىر، ۋاق تايپاسىنان شىققان، اقىلدى، كوبىنەسە كۇشكە ەمەس اقىلعا سالىپ، اسىقپاي ويمەن شەشەدى. بۇل جەردە ەندى 18-عاسىرداعى وقيعا، شىن ومىردە بولعان. قازىرگى تاڭدا اباي وبلىسىندا كۇشىكباي باتىردىڭ بۇلاعى بار»، - دەيدى دانيار جەتپىسوۆ.