پرەزيدەنت رەفورمالارى: ايتىلدى – جاسالدى
ادىلەت مينيسترلىگى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىمەن بىرلەسە وتىرىپ، Digital Justice جوبالار پورتفەلى اياسىندا بىرنەشە ىڭعايلى قىزمەتتەردى ىسكە قوستى.
وسىنداي قىزمەتتەردىڭ ءبىرى – ءموبيلدى قوسىمشا ارقىلى نەكەگە تۇرۋعا ءوتىنىش بەرۋ. ەگەر ءسىز وتباسىن قۇرۋدى جوسپارلاساڭىز، ەندى احاج بولىمىنە بارۋدىڭ، قۇجاتتاردى جيناۋدىڭ، ۇزىن-سونار كەزەكتە تۇرۋدىڭ قاجەتى جوق. ول ءۇشىن بانكتىك قوسىمشاعا كىرىپ، مەملەكەتتىك قىزمەتتەر بولىمىنە ءوتىپ، ءتيىستى ءوتىنىمدى جىبەرۋ جەتكىلىكتى. ازىرگە مۇنى قارجى ينستيتۋتى جاساپ وتىر، بولاشاقتا مۇنداي مۇمكىندىكتەر بانكتىك باسقا قوسىمشالاردا قاراستىرىلماق.
قازاقستان ازاماتتارىنا وسى سيفرلىق قىزمەت ۇناپ وتىر. بيىلعى اقپان ايىنىڭ العاشقى كۇندەرىنەن باستاپ 600-دەن استام جۇپ جاڭا سەرۆيستىڭ كومەگىمەن نەكەنى تىركەۋگە ءوتىنىش راسىمدەدى. ولاردىڭ ۇشتەن بىرىنەن استامى احاج ورگاندارىمەن راستالعان. بۇرىن مۇنداي قىزمەت «ەلەكتروندىق ۇكىمەتتىڭ» سايتىندا عانا قولجەتىمدى بولاتىن.