قاسىم-جومارت توقايەۆقا ناۋرىز اتتى تازى كۇشىگى سىيعا بەرىلدى.
پرەزيدەنت تازى يتتەردىڭ كورمەسىن تاماشالادى، دەپ حابارلايدى اlmaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
«Nomad» ۇلتتىق ساياتشىلىق» قوعامدىق قورىنىڭ ءتوراعاسى بولات قۇنانبايەۆ تازىنى ساقتاۋ، ءوسىرۋ باعىتىندا اتقارىلىپ جاتقان جۇمىستار جونىندە باياندادى.
مەملەكەت باسشىسى تازىنى حالىقارالىق دەڭگەيدە دارىپتەۋ قاجەت ەكەنىن ايتتى.
– «قۇماي تازى – ەرەكشە جانۋار، قازاقتىڭ جەتى قازىناسىنىڭ ءبىرى. ءبىز تازى مەن توبەتتى حالىقارالىق دەڭگەيدە كەڭىرەك دارىپتەۋىمىز كەرەك. سىرتقى ىستەر مينيسترلىگى دە مىندەتتى تۇردە اتسالىسۋى قاجەت. تازىعا ەرەكشە كۇتىم، قامقورلىق كەرەك. بۇل ماڭىزدى ءىس كاسىبيلىكتى تالاپ ەتەدى. سول ءۇشىن ارنايى زاڭ قابىلدادىق»، – دەدى قاسىم-جومارت توقايەۆ.
شارا بارىسىندا اسىل تۇقىمدى تازى ءوسىرۋشى اننا زاحاروۆا پرەزيدەنتكە تازىنىڭ كۇشىگىن سىيعا تارتتى. كۇشىكتىڭ اتى – ناۋرىز، 1،5 ايلىق.
«سىزگە سىيلىق تارتۋ ەتكىمىز كەلەدى. ەجەلدەن قازاقى يت تۇقىمى قازاقستاندا وتە قۇندى سىيلىقتىڭ ءبىرى سانالىپ كەلگەن ەدى. وكىنىشكە وراي، سوڭعى جىلدارى ونىڭ قۇندىلىعى تومەندەپ بارا جاتىر. ءسىز قابىلداعان قازاقى يت تۇقىمدارىن ساقتاۋ جانە كوبەيتۋ جونىندەگى جاڭا زاڭدى قابىلداۋدىڭ ارقاسىندا مىنا كۇشىك تە تازى تۇقىمىن كوبەيتۋگە سەپتىگىن تيگىزەدى دەپ ۇمىتتەنەمىز. قۇجاتتارى بار، اتى – ناۋرىز. ول وسىدان 1،5 اي بۇرىن دۇنيەگە كەلدى. تۇقىمىندا جالعىز بولعاندىقتان، وسىنداي ات بەرۋدىڭ نىشاندىق ءمانى بولدى»، - دەدى پرەزيدەنتكە كۇشىكتى سىيعا تارتقان اسىل تۇقىمدى تازى ءوسىرۋشى اننا زاحاروۆا.
