بۇل سەنبىلىك ورازا ايىنىڭ العاشقى كۇنىمەن تۇسپا تۇس كەلىپ وتىر
بۇگىن الماتى وبلىسىندا سەنبىلىك ءوتىپ جاتىر. تازالىق شاراسىندا 50 مىڭداي ازامات بەلسەنە ات سالىسۋدا، دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
تالدىقورعان قالاسىندا وتكەن سەنبىلىككە قاتىسقان وبلىس اكىمى قانات بوزىمبايەۆ:
«بۇل سەنبىلىك ورازا ايىنىڭ العاشقى كۇنىمەن تۇسپا تۇس كەلىپ وتىر. بار مۇسىلمان ورازا ايىن ساعىنىشپەن كۇتەدى. ورازا - جان تازالىعىنا باستاۋشى اي. قابىل بولسىن! ءبىزدىڭ بۇگىن سەنبىلىككە شىعىپ، اۋلامىزدى، كوشەمىزدى، قالامىزدى تازارتۋىمىز دا ساۋاپتى ءىس. سوڭعى ەكى جىلدا پاندەميادان وسىنداي سەنبىلىككە شىعا المادىق. بۇگىن سول يگى ءداستۇردى قايتا جاڭعىرتىپ، بەلسەندىلەردىڭ باستاماسىمەن سەنبىلىك ۇيىمداستىرىلۋدا. تۇرعىندار ءوز قالاۋىمەن تازالىق جۇمىستارىنا ات سالىسىپ، بەرەكە-بىرلىگىن كورسەتىپ جاتىر»، - دەدى قانات بوزىمبايەۆ.
تازالاۋ، اباتتاندىرۋ مەن كوگالداندىرۋ شارالارىنا وبلىستاعى بارلىق مەكەمە، ۇيىمدار، كوممۋنالدىق قىزمەت سالالارى بەلسەنە قاتىسىپ جاتىر. اتاپ ايتقاندا، وبلىس بويىنشا 50 مىڭداي ازامات 4 مىڭداي كوشەنى، 18 مىڭداي الاڭقايدى قوقىستان تازارتۋدا. سول سياقتى ايماقتاعى 200-دەي ساياباقتى، 950 شاقىرىم ارىقتى قوقىستان ارىلتىپ، 14 مىڭداي كوشەت ەگۋ جوسپارلانعان.