پرەزيدەنت قاسىم-جومارت توقايەۆ ۇستازداردىڭ رەسپۋبليكالىق تامىز كونفەرەنسياسىندا «تازا قازاقستان» ۇعىمىنىڭ ءمانىن كەڭىنەن ءتۇسىندىردى، دەپ حابارلايدى aqshamnews.kz
مەملەكەت باسشىسىنىڭ ايتۋىنشا، تازا قازاقستان – قورشاعان ورتانى تازا ۇستاۋمەن عانا شەكتەلمەيدى. «بۇل – ەڭ الدىمەن وي-سانا تازالىعى. جان-دۇنيەسى تازا ادام قايىرىمدى، مەيىرىمدى بولادى. قولى تازا ادام جەمقورلىققا بارمايدى، ادال بولادى. اسىل قاسيەتتەردى بويىنا سىڭىرگەن ناعىز ادال ازاماتتار ادىلەتتى قازاقستاننىڭ تىرەگى بولا الادى»، – دەدى پرەزيدەنت.
بيىلدان باستاپ ەلىمىزدە «ادال ازامات» اتتى ءبىرتۇتاس تاربيە باعدارلاماسى ىسكە قوسىلادى. باعدارلاما بارلىق مەكتەپتەردە، سونىڭ ىشىندە جەكەمەنشىك ءبىلىم وشاقتارىندا دا قولدانىلادى. سونداي-اق، پەداگوگ ماماندار دايارلايتىن جوعارى وقۋ ورىندارىنا دا ەنگىزۋ ۇسىنىلدى.
پرەزيدەنتتىڭ ايتۋىنشا، ءبىلىم مەن تاربيە – كەز كەلگەن قوعامنىڭ قوس تۇعىرى. مەكتەپ تەك ءبىلىم بەرىپ قانا قويماي، وسكەلەڭ ۇرپاققا دۇرىس جول كورسەتەتىن رۋحاني ورتالىق بولۋى ءتيىس. ۇرپاق تاربيەسىندە «وتباسى – مەكتەپ – مەملەكەت» ۇشتىگى ۇيلەسىمدى جۇمىس ىستەۋى قاجەت.
«جاس ۇرپاققا ەڭبەكسىز ەش يگىلىك بولمايتىنىن ءتۇسىندىرۋ – باستى مىندەت. قوعامدا ماسىلدىققا جول بەرمەۋ كەرەك. تازا قازاقستان – وسى يدەيانى جۇزەگە اسىراتىن قادامداردىڭ ءبىرى»، – دەپ تۇيىندەدى قاسىم-جومارت توقايەۆ.