2025 جىلدىڭ 24 ءساۋىر كۇنى – الماتى قالاسى جاستار ساياساتى باسقارماسى جانە ناۋرىزباي اۋدانى اكىمدىگىنىڭ قولداۋىمەن، «قازاقستان ادام رەسۋرستارى» جەكە مەكەمەسىنىڭ ۇيىمداستىرۋىمەن ناۋرىزباي اۋدانى دەمالىس ورتالىقتارىنىڭ وقۋشىلارى اراسىندا «تازا قازاقستان» اتتى ەكولوگيالىق اكسيا ءساتتى ءوتتى.
اتالعان شارا تابيعاتتى قورعاۋ مەن ەكولوگيالىق تاربيە بەرۋگە باعىتتالعان يگى باستامالاردىڭ جالعاسى بولىپ تابىلادى. جاستار قوعامعا پايداسىن تيگىزۋدى ماقسات تۇتىپ، وزدەرىنىڭ بەلسەندىلىگىمەن جانە جاناشىر ارەكەتتەرىمەن ەرەكشەلەندى.
اكسيا اياسىندا وقۋشىلار ناۋرىزباي اۋدانىنداعى جالعىزباستى اجەلەردىڭ ۇيلەرىنە بارىپ، تازالىق جۇمىستارىن جۇرگىزىپ، اۋلالارىن رەتكە كەلتىردى. بۇل — تەك فيزيكالىق كومەك قانا ەمەس، ۇلكەنگە قۇرمەت كورسەتۋدىڭ، ۇرپاقتار ساباقتاستىعىنىڭ جانە جۇرەكتەن شىققان ىزگىلىكتىڭ ايقىن كورىنىسى. وسىنداي ارەكەتتەر ارقىلى جاستاردىڭ بويىنداعى تاربيەنىڭ، مەيىرىم مەن جاناشىرلىقتىڭ دەڭگەيى بايقالدى.
سونىمەن قاتار، جاس ەرىكتىلەر قوعامدىق ورىندار مەن كوشەلەردە تازالىق جۇمىستارىن جۇرگىزىپ، ەكولوگيالىق مادەنيەتتى ناسيحاتتاۋعا ءوز ۇلەستەرىن قوستى. بۇل تەك قورشاعان ورتانى قورعاۋ ەمەس، سونىمەن قاتار سانالى ازامات قالىپتاستىرۋ جولىنداعى ماڭىزدى قادام.
«تازا قازاقستان» – بۇل تازالىقتىڭ عانا ەمەس، تاربيەنىڭ دە كورىنىسى. وسىنداي باستامالار ارقىلى جاستار بويىنا پاتريوتتىق رۋح، ازاماتتىق بەلسەندىلىك پەن قورشاعان ورتاعا دەگەن جاۋاپكەرشىلىك سىندى قاسيەتتەر دارىتىلۋدا.
ۇيىمداستىرۋشىلاردىڭ ايتۋىنشا، مۇنداي الەۋمەتتىك جوبالار الداعى ۋاقىتتا دا تۇراقتى تۇردە جالعاسىن تاپپاق.
سونىمەن قاتار، ناۋرىزباي اۋدانىنىڭ بالالارى مەن جاستارى ءۇشىن تەگىن ۇيىرمەلەرگە جازىلۋ مۇمكىندىگى بار. شىعارماشىلىق، سپورت، ونەر، ءتىل ۇيرەنۋ سىندى باعىتتار بويىنشا دامۋعا نيەتتى تۇرعىندار تومەندەگى بايلانىس نومىرىنە حابارلاسا الادى:
تەل: +7 707 205 42 45 ايجان ي.، جوبانىڭ ۇيلەستىرۋشىسى