بۇگىن الماتى وبلىسى تارعاپ اۋىلى تۇسىنداعى كەمپينگ-الاڭدا اۋقىمدى ەكولوگيالىق باستاما – «Taza Qazaqstan» road-ەستافەتاسىنىڭ اشىلۋ سالتاناتى ءوتتى، - دەپ حابارلايدى Aqshamnews.kz.
ءبىر اپتاعا جالعاساتىن اۋقىمدى ءىس-شارا بارىسىندا قاتىسۋشىلار الماتى، شىمكەنت قالالارى جانە جامبىل، تۇركىستان، قىزىلوردا وبلىستارى ارقىلى مىڭ شاقىرىمنان استام جولدى ەڭسەرەدى. جوباعا «جاستار رۋحى» جاستار قاناتىنىڭ مىڭداعان بەلسەندىسى مەن جەرگىلىكتى تۇرعىندار اتسالىسادى. اكسيانىڭ باستى ماقساتى – قوعامدا جاڭا ەكولوگيالىق مادەنيەت قالىپتاستىرۋ، تابيعات پەن تاريحي مۇراعا قۇرمەتپەن قاراۋ جانە ازاماتتاردىڭ قورشاعان ورتا الدىنداعى جاۋاپكەرشىلىگىن ارتتىرۋ.
«AMANAT» پارتياسىنىڭ اتقارۋشى حاتشىسى داۋلەت كارىبەك ءوز سوزىندە جاھاندىق عىلىمي قاۋىمداستىق ونداعان جىلدان بەرى كليماتتىڭ وزگەرۋى، سۋ تاپشىلىعى، اۋانىڭ لاستانۋى، ورمان ءورتى، توپىراقتىڭ قۇنارسىزدانۋى سياقتى ەكولوگيالىق اپات ءقاۋپى تۋرالى دابىل قاعىپ كەلە جاتقانىن اتاپ ءوتتى. الايدا قورشاعان ورتانى قورعاۋدا تەك مەملەكەت كۇشىنىڭ جەتكىلىكسىز ەكەنى ايقىن، بۇل – ءاربىر ازاماتتىڭ مىندەتى. سوندىقتان «AMANAT» پارتياسى road-ەستافەتا ارقىلى ءار قازاقستاندىقتىڭ تابيعات پەن تاريحي مۇرانى قورعاۋعا ۇلەس قوسا الاتىنىن، ال بىرلەسىپ ارەكەت ەتسەك، ەكولوگيالىق اپاتتىڭ الدىن الىپ، ەلدى بولاشاق ۇرپاق ءۇشىن جاسىل ءارى ءقاۋىپسىز ەتىپ ساقتاي الاتىنىمىزدى كورسەتەدى.
«مەملەكەت باسشىسى قاسىم-جومارت توقايەۆ اتاپ وتكەندەي، «تازا قازاقستان» بۇل – ءبىر كۇندىك ناۋقان ەمەس، بۇل – ءبىزدىڭ ءومىر سالتىمىز، سوندىقتان تازالىق ءار ادامنان، ءار ۇيدەن، ءاربىر كوشە مەن ءار قالادان باستالۋى كەرەك. وسى سوزدەر ءبىزدىڭ يدەيالىق تۇعىرنامامىزعا اينالدى. قوعامدا تابيعاتقا، تاريح پەن مادەنيەتكە، جالپى قورشاعان ورتاعا ۇقىپتى قاراۋ ادەتىن ورنىقتىرۋ قاجەت. جاستاردىڭ بويىنا ناعىز ەكولوگيالىق ءپاتريوتيزمدى ءسىڭىرىپ، جاۋاپتى مىنەز-قۇلىق قالىپتاستىرۋ – ءبىزدىڭ باستى ماقساتىمىز»، – دەدى ول.
ۇيىمداستىرۋشىلاردىڭ ايتۋىنشا، ەستافەتا اياسىندا تەك قوقىس جيناۋ عانا ەمەس، دەپۋتاتتاردىڭ حالىقپەن كەزدەسۋلەرى، جاستارعا ارنالعان open-air ءىس-شارالارى، قوعامدىق قابىلداۋلار جانە تازا اۋادا «چەمپيوندىق رۋح» جاتتىعۋلارى وتەدى. سونىمەن قاتار «ۆانداليزمگە جول جوق!» جوباسى شەڭبەرىندە «تۇلعالار تۇعىرى» مەموريالدىق كەشەنى، «اقىرتاس» ساراي كەشەنى، «بىرلىك» مونۋمەنتى جانە ەجەلگى ساۋران قالاشىعى سياقتى تاريحي نىساندار تازارتىلىپ، اباتتاندىرىلادى. وسىلايشا road-ەستافەتا تابيعاتتى قورعاۋ، مادەني مۇرانى ساقتاۋ جانە ەكولوگيالىق ءپاتريوتيزمدى قالىپتاستىرۋ مىندەتتەرىن توعىستىرادى.
«بۇعان قوسا، اكسيامىز مادەني-اعارتۋشىلىق ميسسياسىن دا اتقارادى. جاستار مۇنداي جۇمىستار ارقىلى تاريحتى تەرەڭىرەك تانىپ قانا قويماي، تابيعات پەن مادەني مۇراعا قۇرمەتپەن قاراۋدى ۇيرەنەدى. سەبەبى كەز كەلگەن ەسكەرتكىشتى ءبۇلدىرۋ – حالىقتىڭ تاريحي جادىنا قاستاندىق جاساۋمەن تەڭ. وسىدان ەكى جىل بۇرىن «جاستار رۋحى» جاستار قاناتى ۆانداليزمگە قارسى قوعامدىق پەتيسيانى قولداعان بولاتىن. كەيىن سول باستاما ۆانداليزمگە قارسى جاۋاپكەرشىلىكتى كۇشەيتەتىن زاڭنىڭ نەگىزىنە اينالىپ، وعان وتكەن جىلى مەملەكەت باسشىسى قول قويدى»، – دەدى «جاستار رۋحى» ءتوراعاسى اقەركە يسكاندەروۆا.
ءوز كەزەگىندە ءماجىلىس دەپۋتاتى، «AMANAT» پارتياسى فراكسياسىنىڭ مۇشەسى نيكيتا شاتالوۆ پرەزيدەنتتىڭ «تازا قازاقستان» باستاماسى اياسىنداعى ەكولوگيالىق ەستافەتانىڭ قوعامدىق ماڭىزىنا توقتالدى.
«بۇل ەستافەتاعا دەپۋتاتتار دا، جاستار دا، ۆولونتەرلەر مەن جەرگىلىكتى قاۋىم وكىلدەرى دە بىردەي اتسالىسۋدا. بارلىعىنىڭ ماقساتى – تابيعاتتىڭ تازالىعىن ساقتاۋ، تاريحي-مادەني مۇرانى قورعاۋ. وسىنداي يگى باستامالار جاڭا ەكولوگيالىق مادەنيەتتى قالىپتاستىرىپ، ەل ىشىندە پاتريوتيزم مەن اۋىزبىرشىلىكتى ارتتىرا تۇسەدى. بۇل – ءاربىر ازاماتتى ەلدىڭ كەلەشەگىنە جاۋاپكەرشىلىكپەن قاراۋعا ۇندەيتىن قوزعالىس»، – دەدى حالىق قالاۋلىسى.
اكسيا اياسىندا بەلسەندىلەر مەن ۆولونتەرلەر جول جيەگىن، اۆتوتۇراقتار مەن كەمپينگ اۋماقتارىن تازالايدى. جۇمىس كۆادروكوپتەرلەر ارقىلى جۇرگىزىلگەن اەروبارلاۋ دەرەكتەرىنە سۇيەنە وتىرىپ ۇيىمداستىرىلادى. جينالعان قوقىس پوليگوندارعا جەتكىزىلەدى.
«قازاقستان – ۇلان-عايىر دالاسى بار، تابيعاتى ءار الۋان مەملەكەت. كەڭ بايتاق جەرى مەن قايتالانباس تابيعاتىمەن تاڭعالدىراتىن ەل. ءبىراق وسىناۋ كەڭ كوسىلگەن بايتاق جەرىمىزدە قوقىس ۇيىندىلەرى كوزگە ءتۇسىپ، اسەم تابيعاتتىڭ اجارىن كەتىرىپ جاتادى. وتكەن جىلى «جاستار رۋحى» جاستار قاناتىنىڭ 2 مىڭنان استام بەلسەندىسى مەن جاقتاستارى استانادان الماتىعا دەيىنگى 1200 شاقىرىمدىق جولدى ءجۇرىپ ءوتىپ، 100 توننا قوقىس جينادى. بيىلعى مىندەت – تەك قوقىس جيناپ قانا قويماي، ونى سۇرىپتاپ، ەلدىڭ ەكولوگيالىق مادەنيەتىن دامىتۋعا ۇلەس قوسۋ. بۇل يگى ىسكە ءار قازاقستاندىق ۇلەس قوسا الادى. رەسپۋبليكامىزدى بىرگە تازا ءارى جايلى مەكەنگە اينالدىرايىق»، – دەدى «قوعامدى ەكولوگيالىق دامىتۋ ورتالىعى» قوعامدىق قورىنىڭ جەتەكشىسى تانير ياسسا.
ايتا كەتەيىك، «تازا بەيسەنبى» اكسياسى اياسىندا «AMANAT» پارتياسىنىڭ مۇشەلەرى مەن «جاستار رۋحى» بەلسەندىلەرى ءبىر جارىم جىلعا جەتپەيتىن ۋاقىتتا 1000-نان استام لاستانعان اۋماقتى تازارتىپ، اباتتاندىردى. ءىس-شارالارعا 90 مىڭعا جۋىق ادام قاتىسىپ، 160 مىڭ توننادان استام قوقىس شىعارىلدى.
ەكولوگيالىق ماسەلەلەردى شەشۋ – «AMANAT» پارتياسىنىڭ سايلاۋالدى باعدارلاماسىنداعى ماڭىزدى باسىمدىقتاردىڭ ءبىرى. 2027 جىلعا دەيىن تۇرمىستىق قاتتى قالدىقتاردى قايتا وڭدەۋ جانە كادەگە جاراتۋ ۇلەسىن 36%-عا دەيىن ارتتىرۋ، جايىق وزەنىنىڭ ەكوجۇيەسىن قالپىنا كەلتىرۋ، بالقاش كولىنە تۇراقتى سۋ اعىنىن قامتاماسىز ەتۋ، اۋا ساپاسىنىڭ يندەكسىن ەنگىزۋ، كاسىپورىنداردىڭ لاستاۋشى زاتتار شىعارىندىلارىن 40%-عا دەيىن تومەندەتۋ، سونداي-اق 14 جاڭا سۋ قويماسىن سالۋ جانە قولدانىستاعى 16 قويمانى قايتا جاڭعىرتۋ جوسپارلانعان.