الماتىدا “تازا قازاقستان: تابيعات پەن ۇلتتىڭ بىرلىگىندە” اتتى ەكولوگيالىق-مادەني ءىس-شارا ءساتتى ءوتتى. بۇل اۋقىمدى جيىن – ەلىمىزدەگى ەكولوگيالىق قوزعالىستىڭ جاڭا كەزەڭىن ءبىلدىرىپ قانا قويماي، حالىقارالىق ىنتىماقتاستىقتى نىعايتاتىن ماڭىزدى الاڭعا اينالدى.
ءىس-شارا “بايتاق” جاسىلدار پارتياسىنىڭ باستاماسىمەن ۇيىمداستىرىلىپ، وعان ەلىمىزدىڭ تۇكپىر-تۇكپىرىنەن كەلگەن پارتيا مۇشەلەرى، قوعام قايراتكەرلەرى مەن مۇحتار شاحانوۆ، اسىلى وسمان باستاعان زيالى قاۋىم وكىلدەرى قاتىستى. سونىمەن قاتار، قىرعىزستان، وزبەكستان جانە موڭعوليا ەلدەرىنىڭ جاسىلدار پارتياسى وكىلدەرى ارنايى دەلەگاسيالارمەن كەلىپ، ءىس-شارانىڭ حالىقارالىق ماڭىزىن ارتتىردى.
ورتالىق ازيا مەن ەۋروپا ەلدەرىنىڭ ديپلوماتيالىق جانە رەسمي وكىلدەرىنىڭ قاتىسۋى ەكولوگيالىق جاۋاپكەرشىلىكتىڭ ورتاق ەكەنىن ايقىن كورسەتتى.
ءىس-شارا بارىسىندا ۇلتتىق ويىندار مەن قولونەر كورمەسى؛ ەكو-بىلىمگە ارنالعان دوڭگەلەك ۇستەلدەر مەن پىكىرتالاستار؛ مادەني كونسەرتتىك باعدارلاما قامتىلدى. بىلتىر “تازا قازاقستان” رەسپۋبليكالىق ەكولوگيالىق اكسياسى اياسىندا 6،2 ميلليوننان استام ادام قاتىسىپ، 1،1 ميلليون توننا قالدىق جينالدى. سونىمەن بىرگە، 1،6 ميلليوننان استام اعاش وتىرعىزىلىپ، زاڭسىز 4 800 قوقىس الاڭىنىڭ 91 پايىزى جويىلدى. ازاماتتاردىڭ شاعىمدارى مەن ۇسىنىستارىن قابىلدايتىن @TazaQazBot تەلەگرام-بوتى ارقىلى 10،7 مىڭ ءوتىنىش ءتۇسىپ، ولاردىڭ 9،7 مىڭى وڭ شەشىمىن تاپتى. بۇل كورسەتكىشتەر قازاقستان ازاماتتارىنىڭ ەكولوگيالىق سانا-سەزىمىنىڭ ارتىپ كەلە جاتقانىن كورسەتەدى. “تازا قازاقستان” – تابيعاتتى قورعاۋ مەن ۇلتتىق بىرلىكتى ۇشتاستىراتىن بىرەگەي پلاتفورما رەتىندە قالىپتاسىپ كەلەدى.
“تازا ەكولوگيا – بۇل ۇلتتىڭ دەنساۋلىعى مەن بولاشاعى. تابيعاتتى قورعاۋ ارقىلى ءبىز ۇلتتىق بولمىسىمىزدى، ۇرپاعىمىزدىڭ اماندىعىن ساقتاپ قالامىز. بۇل – ءار ازاماتتىڭ ورتاق پارىزى. “تازا قازاقستان” – بۇل تەك ءبىر كۇندىك اكسيا ەمەس، بۇل – تۇراقتى، جۇيەلى نىق قادام. ول ەلىمىزدىڭ جاسىل بولاشاعىن قامتاماسىز ەتۋگە باعىتتالعان ورتاق مىندەت پەن جاھاندىق جاۋاپكەرشىلىك ۇلگىسى”، – دەيدى “بايتاق” جاسىلدار پارتياسىنىڭ ءتوراعاسى ازاماتحان امىرتايەۆ.