تازا ەنەرگياعا كوشۋ – بۇگىنگى كۇننىڭ باستى مىندەتتەرىنىڭ ءبىرى

اينۇر بەگىمبايەۆا، ەنەرگەتيكا جانە جاسىل تەحنولوگيالار ينستيتۋتىنىڭ ديرەكتورى:

سوڭعى 10 جىلدا قازاقستاننىڭ عالىمدارى ورتاشا جىلدىق تەمپەراتۋرانىڭ شامامەن 7%-عا ارتقانىن اتاپ ءوتتى. بۇل وزگەرىس 2016 جىلمەن سالىستىرعاندا ورىن الىپ وتىر. ياعني، كليماتتىڭ وزگەرۋى ءبىز ويلاعاننان الدەقايدا تەز، ءبىر ۇرپاقتىڭ كوز الدىندا ءجۇرىپ جاتىر. ءبىز قازىرگى ۋاقىتتا كليماتتىق كۇن تارتىبىندە بەلگىلەنگەن نورمالاردان اسىپ كەتۋدەمىز.

كليماتتىڭ وزگەرۋىمەن كۇرەسۋ، جانە بۇل وزگەرىستەردىڭ تەرەڭ ءارى ءقاۋىپتى سالدارىن بولدىرماۋ ءۇشىن جاڭا ەنەرگەتيكالىق شەشىمدەر قاجەت. وسى ماقساتتا اتوم ەلەكتر ستانسيالارىن سالۋ ماڭىزدى. اتوم گەنەراسياسى قازىرگى ۋاقىتتا تومەن كومىرتەكتى ەنەرگيا كوزدەرىنىڭ ەڭ ءتيىمدىسى رەتىندە دالەلدەنگەن. ول بىزگە پارنيكتىك گازداردىڭ شىعارىندىلارىن ازايتىپ، ەكولوگيالىق تەپە-تەڭدىكتى ساقتاۋعا مۇمكىندىك بەرەدى.

اتوم ەنەرگەتيكاسىن دامىتۋ ءبىزدىڭ الدىمىزدا تۇرعان تۇراقتى دامۋدىڭ بىرنەشە ماڭىزدى ماقساتتارىنا قول جەتكىزۋگە كومەكتەسەدى. بىرىنشىدەن، بۇل تازا ەنەرگياعا قول جەتكىزۋ جانە ونى حالىققا قولجەتىمدى ەتۋ مۇمكىندىگىن بەرەدى. تازا ەنەرگياعا كوشۋ – بۇگىنگى كۇننىڭ باستى مىندەتتەرىنىڭ ءبىرى. ەكىنشىدەن، بۇل كليماتتىڭ وزگەرۋىنە قارسى كۇرەستىڭ ەڭ ءتيىمدى جولدارىنىڭ ءبىرى. اتوم ەنەرگەتيكاسى كومىرتەگى ءىزىن ازايتىپ قانا قويماي، بىزگە ەكولوگيالىق تۇراقتىلىقتى قامتاماسىز ەتۋگە مۇمكىندىك بەرەدى.

اتوم ەلەكتر ستانسيالارىن سالۋ – قازاقستاننىڭ ەنەرگەتيكالىق بولاشاعىن جانە كليماتتىڭ وزگەرۋىنە قارسى كۇرەستەگى تابىسىن قامتاماسىز ەتەتىن نەگىزگى قادام. كليماتتىڭ وزگەرۋى ءبىزدىڭ قولىمىزداعى شەشىمدەرگە تاۋەلدى، سوندىقتان بۇگىننەن باستاپ باتىل ارەكەت ەتۋىمىز قاجەت.