الماتى قالاسى اۋەزوۆ اۋدانىنىڭ مەكتەپتەرى قالا تازالىعىنا اتسالىسۋدا. «الماتى – ءبىزدىڭ ورتاق ءۇيىمىز» اكسياسى اياسىندا №104 جالپى ءبىلىم بەرەتىن مەكتەپ پەن №202 مەكتەپ-گيمنازياسىندا تابيعاتتى قورعاۋ شاراسى ءوتتى.
تازالىق اكسياسىنا 600-گە جۋىق مەكتەپ وقۋشىلارى بەلسەنە قاتىستى. مەكتەپ اۋلاسى قوقىستان تازارتىلدى. وقۋشىلار اعاش كوشەتتەرى مەن گۇلدەر وتىرعىزىپ، جاسىل جەلەكتەردى زيانكەستەردەن قورعاۋ ءۇشىن تۇپتەرىن اكتەدى. ەگىلگەن اعاشتاردى سۋعاردى دا ۇمىتپادى. تابيعاتقا دەگەن ماحابباتتارى ارتقان وقۋشىلار، اينالاسىن ەندى لاستامايتىندارىن ايتا كەتتى.
– ءبىزدىڭ نەگىزگى ماقساتىمىز – ەلىمىزگە سانالى ءارى تاربيەلى ۇرپاق ءوسىرۋ. وسى ورايدا، بۇل شارانى وقۋشىلاردىڭ ەكولوگيالىق جانە تازالىق مادەنيەتىن قالىپتاستىرۋ ماقساتىندا ۇيىمداستىردىق. «الماتى – ءبىزدىڭ ورتاق ءۇيىمىز» اكسياسى اياسىندا ءبىلىم وردامىزدا ءارتۇرلى شارالار وتكىزىلۋدە. وقۋشىلار مەكتەبىمىزدىڭ اينالاسىن كوركەيتۋگە ءوز ۇلەستەرىن قوسۋدا. بۇل، ارينە قۋانتارلىق جاعداي. سەبەبى، كەلەشەك ۇرپاعىمىز تابيعاتىن سۇيەتىن ازامات بولىپ قالىپتاسۋدا. ءقازىر وقۋشىلاردىڭ اراسىندا ارنايى ەكو-ساقشىلار دا بار. ولار، مەكتەپتىڭ ءىشى مەن سىرتىنداعى تازالىققا جاۋاپ بەرەدى. مۇنداي شارالار ولاردىڭ قورشاعان ورتاعا دەگەن ماحابباتىن ارتتىرارى ءسوزسىز، – دەدى №104 جالپى ءبىلىم بەرەتىن مەكتەپتىڭ تاربيە ءىسى جونىندەگى ورىنباسارى مايگۇل ورازىحانوۆا.
– بارلىعىمىز بىلەتىن ءبىزدىڭ قوعامدا تازالىق مادەنيەتى تومەن دەڭگەيدە. بۇل اكسيا باستالعالى بايقاعانىمىز، بارلىق قالا تۇرعىندارى تابيعاتتى ايالاۋعا جۇيەلى تۇردە جۇمىس جاساۋدا. بۇنداي جاقسى شارالار، ءبىر اي عانا ەمەس ءجيى بولىپ تۇرسا دەيمىز. ماقسات – بالالاردى مەكتەپ قابىرعاسىنان تازالىققا، تابيعاتتى قورعاۋعا ۇيرەتۋ. وسى ورايدا، ءار اپتانىڭ بەيسەنبى كۇنىن تازالىققا ارنادىق. ول كۇنى وقۋشىلار، ءوز سىنىپتارىن، مەكتەپتىڭ اينالاسىنا تازالىق جۇمىستارىن جۇرگىزەدى. وسىلايشا، بالالار بۇل ءىستىڭ قانشالىقتى ماڭىزدى ەكەنىن تۇسىنەدى. بۇگىنگى شارادا، مەكتەپ تۇلەكتەرى مەن جوعارعى سىنىپ وقۋشىلارى اعاشتار وتىرعىزدى. كەيبىر بالالار وزدەرى گۇلدەر اكەلىپ وتىرعىزدى. بۇل ءبىزدىڭ دۇرىس باعىتتا جۇمىس جاساپ جاتقانىمىزدى كورسەتسە كەرەك. بالالار بىردەن بولماسا دا، ۋاقىت وتە كەلە تازالىق مادەنەيتىن بويلارىنا سىڭدىرەتىنىنە سەنىمدىمىز، – دەيدى №202 مەكتەپ-گيمنازيا ديرەكتورى بولات جانايحان ۇلى.
تازالىق مادەنيەتىن قالىپتاستىرۋعا ارنالعان شاراعا مۇعالىمدەر مەن وقۋشىلاردان بولەك، اتا-انالار دا قاتىستى. ولار بالالارعا اعاش پەن گۇلدى قالاي دۇرىس وتىرعىزۋدىڭ تەحنولوگيالارىن ۇيرەتتى. ريتا باكيروۆا ەسىمدى تۇرعىننىڭ ايتۋىنشا، بۇنداي ءىس شارالار بالانىڭ ەلىنە دەگەن سۇيىسپەشىلىگىن ارتتىرادى. قورشاعان ورتاسىن لاستاماۋعا، تازا ۇستاۋعا تاربيەلەيدى. ءبىز بالالارعا ۇلگى كورسەتسەك، ولار دا ءبىزدىڭ ىستەگەنىمىزدى جاسايدى. سوندىقتان، بۇل وقۋشىلاردىڭ عانا جۇمىسى ەمەس، بارلىق قالا تۇرعىنى اتسالىساتىن اكسيا.
№104 جالپى ءبىلىم بەرەتىن مەكتەپتىڭ 10 سىنىپ وقۋشىسى سىمبات مارات قىزى اينالاسىنىڭ تازا بولعانىن ۇناتادى ەكەن.
– جالپى بۇنداي ءىس-شارالار مەكتەبىمىزدە ءجيى وتكىزىلىپ تۇرادى. ءوز باسىم تازالىقتى جاقسى كورەمىن. سوندىقتان، مەكتەپ اينالاسىنىڭ دا تازا بولىپ تۇرعانىن قالايمىن. ءبىر قۋاناتىنىم، ءبىزدىڭ ارتىمىزدان ەرگەن كىشى سىنىپ وقۋشىلارى دا ءبىر ءۇيىدڭ بالاسىنداي جۇمىلۋدا. ءبىز ولارعا ۇلگى بولعانىمىزعا قاتتى قۋانىشتىمىز، – دەيدى مەكتەپ پرەزيدەنتى سىمبات مارات قىزى.