ايگەرىم سەرىك قىزى، قازاق ءتىلى ءپانى ءمۇعالىمى:
– بارلىق يگىلىكتەردىڭ ەڭ ۇلىسى – تاۋەلسىزدىك، – دەپ گودۆين ايتقانداي، ءبىز تاۋەلسىزدىگىمىزدى قۇرمەتتەپ، ونىمەن ماقتانۋىمىز كەرەك. قازىرگى تاڭدا قانشاما حالىقتار بار ءوز ەلىن، جەرىن، ءتىلىن، ءدىنىن قايتارۋدى ارماندايتىن. تاۋەلسىزدىك ءۇشىن جانىن بەرۋدەن تايىنبايتىن. سوندىقتان دا وسى ەركىندىگىمىزگە شۇكىرشىلىك ايتىپ، ءبىلىم جولىندا، عىلىم سالاسىندا جاستىعىمىزدى، بىلىكتىلىگىمىزدى پايدالانا وتىرىپ، ەلىمىزدى دامىعان مەملەكەتتەر قاتارىنا قوسۋىمىز قاجەت.
بۇگىندە قازاق ءتىلى مەملەكەتتىك تىلگە اينالدى. عاسىرلار بويى شەت جەردە جۇرگەن ميلليونداعان وتانداستارىمىز، قانداستارىمىز ءوز اتامەكەنىنە ورالدى. قازاقستاندا تۇراتىن بارلىق ۇلتتاردىڭ ءتىلىنىڭ، ءدىنىنىڭ دامۋىنا تولىق مۇمكىندىك جاسالدى.
ءتىلىمىزدىڭ ارمەن قاراي دامىپ، وركەندەۋىنە ءوز سەپتىگىمىزدى تيگىزۋ ماقساتىندا اتا-انامنىڭ جولىن جالعاپ، ۇستازدىق قىزمەتتى تاڭدادىم. قازىرگى تاڭدا مەكتەپكە دايارلىق سىنىبىنداعى بالالارعا قوسىمشا ساباق بەرەمىن. مەن ءوز ءتىلىمدى، ەلىمدى، ەركىندىگىمدى ماقتان ەتەمىن. تاۋلسىزدىگىمىز ماڭگىلىك جاساي بەرسىن!
رايىمبەك لۇقپان ۇلى، سپورت جاتتىقتىرۋشىسى:
– بۇگىندە ەلباسى نۇرسۇلتان نازاربايەۆ سپورت سالاسىنا ايرىقشا كوڭىل بولۋدە. سوڭعى جىلدارى كوپتەگەن سپورت نىساندارى سالىندى. سپورتقا جانى قۇشتار جاستارعا جەتىستىكتەرگە جەتۋگە مول مۇمكىندىك بار. وسى كۇنگە دەيىن وليمپيادادا قازاق بالاسى ەركىن كۇرەستەن جەڭىسكە جەتكەن جوق. مەنىڭ ەڭ بيىك ماقساتتارىمنىڭ ءبىرى – كوك بايراعىمىزدى جەلبىرەتەر وليمپيادا چەمپيونىن دايىنداپ شىعارسام دەيمىن. ءوزىم بالا كەزىمنەن كۇرەسپەن اينالىسامىن. اكەم دە 20 جىل ءدال وسى سپورت سالاسىندا ەڭبەك ەتكەن جان. سول العاش دودالارعا قاتىسىپ جۇرگەن كەزدەرى ءالى ەسىمدە، جەرگە توسەيتىن دۇرىس كىلەم دە بولماپتى. ال بۇگىندە جاسوسپىرىمدەرگە بارلىق مۇمكىندىك جان-جاقتى قاراستىرىلعان. تەك سونى ۇتىمدى پايدالانۋ كەرەك.
تاۋەلسىزدىكتىڭ 30 جىلدىعى مەرەكەسىنىڭ تابالدىرىعىندا تۇرىپ، وسىنداي بىرلىگى مىقتى ەلدە تۋعانىما شەكسىز باقىتتىمىن. ەگەمەن ەلىمىزدىڭ ەرتەڭىنە قىزمەت ەتۋدى ماقتانىش تۇتامىن. تۋعان جەردىڭ وركەندەۋىنە ۇلەس قوسۋدى پەرزەنتتىك پارىزىم دەپ سانايمىن.
بۇلان احمەتقالي، ستۋدەنت:
– تاۋەلسىزدىك العان از ۋاقىتتىڭ ىشىندە ەلىمىزدە 1993 جانە 1995 جىلدارى ەكى بىردەي كونستيتۋسيا قابىلداندى. ەلىمىز پرەزيدەنتتىك باسقارۋ جۇيەسىنە ءوتتى.
بيلىكتىڭ بارلىق سالالارى كونستيتۋسياعا ساي قىزمەت اتقارۋدا. مەملەكەتىمىزدىڭ قۇقىقتىق قاتىناستارىن رەتتەيتىن كوپتەگەن زاڭدار، كودەكستەر، زاڭنامالار قابىلدانىپ، مەملەكەتتىك قۇرىلىستىڭ وركەن دەۋىنە سۇبەلى ۇلەس قوسىلىپ جاتىر. بۇگىندە ءاربىر قازاقستاندىقتىڭ قۇقىعى قورعالعان. دەموكراتيالىق ەل بولعاندىقتان، جاسىمىز دا، ەگدە جاستاعى قارتتارىمىز دا ءوز پىكىرلەرىن جەتكىزە الادى. وزىمدە قۇقىق سالاسىندا ءبىلىم الىپ، كىشىگىرىم قىزمەتتەر اتقارعاندىقتان، تاۋەلسىزدىكتىڭ ارقاسىندا ءاربىر ادام ءوز ويىن جەتكىزە الاتىندىعىنا كوزىم جەتتى. مەن تاۋەلسىز ەلدە ءومىر ءسۇرىپ جاتقانىما قۋانامىن.