تاۋەلسىزدىكتىڭ ماڭىزى ەرەكشە

ەگەمەندىكتىڭ قاسيەتى بولەك

تاۋەلسىز عۇمىر كەشۋ باقىت. ونى ۇستاپ تۇرۋ جانە باياندى ەتۋ پارىز. الەمدە قاشاما حالىق بار. سونىڭ رەسمي مويىندالعانى 190 ەل شاماسىندا. ەگەمەندىكتى – اتا-بابالاردان بىزگە امان بولعان اسىل مۇرا دەپ سانايمىز. تىم قاستەرلى. ءمانى زور. مىڭ تاۋبە! بيىل قاستەرلى تاۋەلسىزدىگىمىزگە 30 جىل تولادى. وسىعان بايلانىستى ساۋالناما جاساعان بولاتىنبىز.

جىگەر اسقار، جاس اقىن

– دۇنيەدە اسا قاستەرلى ەكى نارسە بار بولسا، سونىڭ ءبىرى تاۋەلسىزدىك. سيسەرون «بارىنەن دە تەك قانا وزىنە باعىنىشتى ادام باقىتتى» دەپ ايتىپتى. ويشىلدىڭ سوزىندە عاجايىپ ءمان-ماعىنا جاتىر. ءبىز بايتاق وتاندا جاساپ جاتىرمىز. مەن ءۇشىن تۋعان ولكەمىزدىڭ كولى، ءشولى، دالاسى، تاۋى مەن تاسىتا ىستىق. ايرىقشا! سوزبەن سۋرەتتەۋ قيىن. ءتىل جەتپەيدى. وسىنداي مامىراجاي، بەيبىت مەكەندە عۇمىر كەشىپ جاتقانىما ىشتەي قۋانامىن. شۇكىر! ەڭ باستىسى باستاعى باقتى باعالاۋ بارىمىزگە پارىز. ۋاقىت الماسادى، زامان وزگەرۋى مۇمكىن. ءبىراق وزگەرمەيتىن ءبىر نارسە بار. ول – تۋعان جەر. اركىمنىڭ تۋعان جەردى ءسۇيۋى ءار بولەك. دەگەنمەن، سونى سەزىنە ءبىلۋ ءپاتريوتيزمنىڭ ءبىر بەلگىسى. قازاق حالقى «وتان وت باسىنان باستالادى» دەپ ءجاي ايتپاعان. وسىعان ۋاقىت وتكەن سايىن كۋا بولۋدامىز. ءسوز سوڭىندا ايتارىم، ەگەمەندى مەملەكەتىمىز ماڭگى جاساسىن دەمەكپىن.