الاتاۋ اۋدانىندا ب. مومىش ۇلى كوشەسىنىڭ باتىسىنا قاراي جەلىلى جاڭا ساياباق سالىنىپ، 107،1 گا الاڭدا 600-گە جۋىق ءتۇرلى اعاش وتىرعىزىلدى.
الماتى اكىمى باقىتجان ساعىنتايەۆ «الماتى» تا-داعى Akimat Live باعدارلاماسىنىڭ تىكەلەي ەفيرىندە الەۋمەتتىك، وندىرىستىك جانە ينفراقۇرىلىمدىق جاڭا نىساندار تۋرالى ايتىپ بەردى، دەپ حابارلايدى Almaty-akshamy.kz
ماسەلەن، رىسقۇلوۆ داڭعىلى مەن ەمسوۆ كوشەسىنىڭ قيىلىسىندا كوپتەن كۇتكەن جولايرىق، سونداي-اق اباي داڭعىلى بويىمەن مومىش ۇلى كوشەسىنەن الاتاۋ كوشەسىنە دەيىن جانە ودان ءارى قالانىڭ باتىس شەكاراسىنا دەيىن وتپەلى كولىك قوزعالىسى اشىلدى.
يندۋستريالدى ايماقتا ۇلكەن ديامەترلى دانەكەرلەنگەن بولات قۇبىرلار شىعاراتىن زاۋىت ىسكە قوسىلدى. بۇدان باسقا، الاتاۋ اۋدانىندا يندۋستريالدى ايماق نىساندارىنىڭ ءورت قاۋىپسىزدىگىن قامتاماسىز ەتەتىن جاڭا زاماناۋي ءورت ءسوندىرۋ دەپوسى اشىلدى.
سونداي-اق، الاتاۋ اۋدانىندا ب. مومىش ۇلى كوشەسىنىڭ باتىسىنا قاراي جەلىلى جاڭا ساياباق سالىنىپ، 107،1 گا الاڭدا 600-گە جۋىق ءتۇرلى اعاش وتىرعىزىلدى.
الەۋمەتتىك نىسانداردىڭ ىشىنەن قالا اكىمى ناۋرىزباي اۋدانىنىڭ №36 ەمحاناسى جانىنان زاماناۋي كت-اپپاراتى بار دياگنوستيكالىق ورتالىقتىڭ اشىلعانىن اتاپ ءوتتى. سونىمەن قاتار، اۋەزوۆ اۋدانىنداعى №186 بالاباقشا كۇردەلى جوندەۋدەن ءوتىپ، سەيسميكالىق كۇشەيتىلىپ ءارى جالدان سوڭ قايتارىلىپ اشىلدى.
الداعى كۇندەرى تاعى دا ءبىرقاتار نىسانداردى اشۋ جوسپارلانىپ وتىر. ناۋرىزباي جانە اۋەزوۆ اۋداندارىندا Nur Otan پارتياسىنىڭ اۋداندىق فيليالدارىنىڭ جاڭا عيماراتتارى اشىلادى. ناۋرىزباي اۋدانىندا №7 قكا قابىلداۋ بولىمشەسىنىڭ جاڭا كورپۋسى دا ىسكە قوسىلادى. الاتاۋ اۋدانىنىڭ توميريس جانە ناۋرىزباي اۋدانىنىڭ قالقامان شاعىناۋداندارىندا جاڭا مەكتەپتەر اشىلادى. جەتىسۋ اۋدانىندا ەكى جاڭا دسك پايدالانۋعا بەرىلەدى.
سونداي-اق، ب. ساعىنتايەۆ «سارىارقا» جانە «ب. مومىش ۇلى» مەترو ستانسيالارىنىڭ جاقىن ارادا تەحنيكالىق ىسكە قوسىلاتىنىن ەسكە سالدى.
بۇدان باسقا، حالىقتىڭ الەۋمەتتىك وسال توپتارىنان 211 وتباسى «نۇرلى جەر» مەملەكەتتىك باعدارلاماسى اياسىندا وسى اۋدانداعى «مادەنيەت» تك-نەن پاتەر كىلتتەرىن الدى.
جاقىندا 29 جاسقا دەيىنگى جۇمىس ىستەيتىن جاستار دا جاڭا قونىستارىن اتاپ ءوتتى. وسى ساناتتاعى الماتىلىقتارعا بارلىعى 1 050 پاتەر بولىنەدى. قالالىق «الماتى جاستارى» جەڭىلدەتىلگەن نەسيە باعدارلاماسى بويىنشا 926 نەسيە بەرىلدى. كوپبالالى وتباسىلارعا ساتىپ الۋ قۇقىعىنسىز 267 جالدامالى پاتەر ءبولىندى.
ب. ساعىنتايەۆ جالپى بيىل كەزەكتە تۇرعان 5 394 ادامنىڭ پاتەر الاتىنىن، ونىڭ ىشىندە «باقىتتى وتباسى» رەسپۋبليكالىق باعدارلاماسى اياسىندا كوپ بالالى، تولىق ەمەس جانە مۇگەدەك بالالاردى تاربيەلەپ وتىرعان وتباسىلار ءۇشىن 1 013 كرەديتتىك زاەم، «شاڭىراق» باعدارلاماسى بويىنشا كەزەكتە تۇرعانداردىڭ بارلىق ساناتتارى ءۇشىن 2146 كرەديتتىك قارىز بەرىلەتىنىن اتاپ ءوتتى.