كەرەكۋ وڭىرىندە قايىرىمدى تىرلىك بولدى
بۇگىن كەرەكۋدە وتكەن «قايىرىمدى ىستەر مارافونىنىڭ» قورىتىندىسىنا ارنالعان سالتاناتتى شارادا ق ر اقپارات جانە قوعامدىق دامۋ ءمينيسترى ايدا بالايەۆا قازاقستان پرەزيدەنتى قاسىم-جومارت توقايەۆتىڭ جالپىۇلتتىق ءىس-شاراعا بەلسەندى قاتىسقان ازاماتتارعا ۇندەۋىن وقىپ بەردى، دەپ حابارلايدى Almaty-akshamy.kz
«بۇل – حالقىمىزدىڭ اسىل قاسيەتتەرىن دارىپتەپ، كوپشىلىكتى جاقسىلىق جاساۋعا جۇمىلدىراتىن جالپىۇلتتىق جوبا. مەرەيلى جىلدا ەلىمىزدە قوعامدىق ماڭىزى بار ناقتى جۇمىستار اتقارىلۋدا. وسى مارافون – سونىڭ جارقىن مىسالى. ۆولونتەر جىلىنداعى يگىلىكتى ىستەر جالعاسىن تاۋىپ، داستۇرگە اينالعانىن كورسەتەدى. شىن مانىندە، قيىندىققا تاپ بولعان ادامعا قامقورلىق جاساۋ – قانىمىزدا بار قاسيەت»، - دەلىنگەن مەملەكەت باسشىسىنىڭ ۇندەۋىندە.
سالتاناتتى شاراعا ق ر اقپارات جانە قوعامدىق دامۋ ءمينيسترى ايدا بالايەۆا، پاۆلودار وبلىسىنىڭ اكىمى ءابىلقايىر سقاقوۆ، پارلامەنت دەپۋتاتتارى، ورتالىق جانە جەرگىلىكتى اتقارۋشى ورگانداردىڭ، وڭىرلىك جانە رەسپۋبليكالىق ۇەۇ وكىلدەرى، حالىقارالىق ۇيىمداردىڭ، ساراپشىلار قاۋىمداستىعىنىڭ جانە ب ا ق وكىلدەرى قاتىستى.
«مارافونعا 1200 ۇەۇ مەن ۆولونتەرلىك ۇيىم، 300-دەن استام ءبىلىم بەرۋ ۇيىمى، 360 ۇجىم مەن كاسىپوداق قاتىستى. ۇجىمدار مەن كوممەرسيالىق ۇيىمداردىڭ قايىرىمدىلىققا جىبەرگەن جالپى سوماسى 6،2 ملرد تەڭگەنى قۇرادى»، - دەدى ا.بالايەۆا ءوز سوزىندە.
مينيستر پرەزيدەنتتىڭ باستاماسىن قولداۋ ىسىندە ەرەكشەلەنگەن جانە وزگەلەرگە ايرىقشا ۇلگى بولعان وڭىرلەردى اتاپ ءوتتى.
«بارلىق كورسەتكىشتەر بويىنشا بۇل: پاۆلودار، شىعىس قازاقستان، قاراعاندى جانە اقمولا وبلىستارى»، - دەدى ا.بالايەۆا.
سونداي-اق، ءىس-شارا بارىسىندا پاۆلودار وبلىسىنىڭ اكىمى ءابىلقايىر سقاقوۆ، پارلامەنت ءماجىلىسىنىڭ دەپۋتاتى ۆەرا كيم ءسوز سويلەدى.
مارافوننىڭ جابىلۋى اياسىندا «ەڭ مەيىرىمدى» بايقاۋىنىڭ جەڭىمپازدارى، سونداي-اق قايىرىمدىلىق سالاسىندا ماڭىزدى قىزمەتتى جۇزەگە اسىراتىن ۇيىمداردى انىقتاۋ، تانۋ جانە كوتەرمەلەۋ ءۇشىن جىل سايىن وتكىزىلەتىن «جومارت جۇرەك» قايىرىمدىلىق سىيلىعىنىڭ لاۋرەاتتارى ماراپاتتالدى.