قىرىمبەك كوشەربايەۆ ەلىمىزدىڭ ءبىر توپ شىعارماشىل جاستارىمەن جۇزدەستى

مەملەكەتتىك حاتشى قاراكوزدەرمەن ديدارلاستى

بۇگىن ەل تاۋەلسىزدىگىنىڭ 30 جىلدىعىن مەرەكەلەۋ جانە قازاقتىڭ ۇلى اقىنى جامبىل جابايەۆتىڭ 175 جىلدىق مەرەيتويىن قورىتىندىلاۋ اياسىندا قازاقستان رەسپۋبليكاسىنىڭ مەملەكەتتىك حاتشىسى ق.ە. كوشەربايەۆ  الماتى وبلىسى جامبىل اۋدانىنداعى جامبىل جابايەۆتىڭ ادەبي مەموريالدى مۋزەيىندە ەلىمىزدىڭ ءبىر توپ شىعارماشىل جاستارىمەن كەزدەستى، دەپ حابارلايدى Almaty-akshamy.kz

قازاقستان رەسپۋبليكاسى پرەمەر-مينيسترىنىڭ ورىنباسارى ە.ل. توعجانوۆ، قازاقستان رەسپۋبليكاسى مادەنيەت جانە سپورت ءمينيسترى ا.ر. رايىمقۇلوۆا، سونداي-اق كورشىلەس قىرعىز رەسپۋبليكاسىنىڭ مەملەكەتتىك حاتشىسى س.س. كاسمامبەتوۆ، مادەنيەت، اقپارات، سپورت جانە جاستار ساياساتى ءمينيسترى ا.ك. جامانكۋلوۆ قاتىسقان القالى جيىندا اقىن جانداربەك بۇلعاقوۆ پەن ميراس اسان، قۇرمانعازى وركەسترىنىڭ ديريجەرى ابىلاي تولەپبەرگەن، حالىقارالىق بايقاۋلاردىڭ جۇلدەگەرى رۋحيا بايدۇكەنوۆا، ونەرتانۋشى عالىم، «دارىن» مەملەكەتتىك جاستار سىيلىعىنىڭ لاۋرەاتى، تمد ەلدەرى اراسىندا «ۇزدىك جاس عالىم» توسبەلگىسىنىڭ يەگەرى ايگەرىم ەسپەنوۆا،  سولتۇستىك قازاقستان وبلىسى ع. مۇسىرەپوۆ اۋدانى ۆولودار اۋىلدىق كىتاپحاناسىنىڭ كىتاپحاناشىسى نيكولاي ۆەربوۆسكيي، «Made in kz»توبىنىڭ جەتەكشىسى باۋىرجان يتەكەيەۆ، قازاقستان رەسپۋبليكاسى ۇلتتىق مۋزەيىنىڭ ەكسكۋرسوۆودى ءامىرجان ءسادۋاقاس ت.ب. سەكىلدى جاس دارىن يەلەرى بولدى.

كەزدەسۋگە قاتىسۋشىلار ەلىمىزدە جاستارعا كورسەتىلىپ وتىرعان مەملەكەتتىك قولداۋ جۇمىستارىنا ريزاشىلىعىن بىلدىرە كەلە، الداعى ۋاقىتتاعى جوسپارلارىمەن ءبولىسىپ، ۇسىنىستارىن ايتتى.

سونىڭ ىشىندە كرەاتيۆتى يندۋستريا اياسىندا جاس سۋرەتشىلەرگە قولداۋ كورسەتۋ، وتاندىق جانە شەتەلدىك ارتيستەردىڭ شىعارماشىلىعىنا قولداۋ كورسەتكەن "ازيا داۋىسى" حالىقارالىق بايقاۋىنىڭ جۇمىسىن جانداندىرۋ، ەلىمىزدەگى ورتا ءبىلىم بەرۋ ۇيىمدارىنىڭ باستاۋىش سىنىپ باعدارلاماسىنا قازاقتىڭ كۇي ونەرىن، اڭىز اڭگىمەلەرىن تىڭداۋدى ەنگىزۋ ۇسىنىلدى.

سونىمەن قاتار كەزدەسۋدە جىر الىبى ج.جابايەۆتىڭ 175 جىلدىعىنا وراي اعىمداعى جىلى تۇڭعىش رەت باسىپ شىعارىلعان «جامبىل الەمى» اتتى 30 تومدىق كىتاپتىڭ تۇساۋى كەسىلدى.

ءىس-شارا بارىسىندا شىعارماشىل جاستارعا جىر الىبى جامبىلدىڭ 30 تومدىعى مەن قازاقتىڭ دومبىرا اسپابى سىيعا تارتىلدى.