تاۋەلسىزدىگىمىزدىڭ 30 جىلدىعى اياسىندا ۇيىمداستىرىلعان بۇل ءىس-شاراعا دارىندى سۋرەتشى تاڭسىق ءماجيتوۆانىڭ 60-تان استام اۆتورلىق تۋىندىسى ۇسىنىلدى.
«قازاقستان» ورتالىق كونسەرت زالىندا ەلىمىزدىڭ كورنەكتى وكىلدەرىنە ارنالعان «تاۋەلسىزدىك تۇلعالارى» كوركەم پورترەتتەر كورمەسى اشىلدى، دەپ حابارلايدى اlmaty-akshamy.kz ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
ءىس-شارانىڭ اشىلۋ سالتاناتىندا ق ر مادەنيەت جانە سپورت ءمينيسترى اقتوتى رايىمقۇلوۆا: «رەسپۋبليكا جۇرتشىلىعىنىڭ نازارىنا ۇسىنىلعان پورترەتتەردىڭ ءبارىن تاڭسىق ماجيتوۆا ناتۋرادان سالىپ شىقتى. بۇل الەمدىك ءۇردىستىڭ وزىندە سيرەك كەزدەسەتىن قۇبىلىس»، - دەپ ەرەكشە اتاپ ءوتتى.
پورترەتتەردى سالۋ بارىسىندا جۇزبە-جۇز سىرلاسۋ ارقىلى كەيىپكەرلەرىنىڭ حاراكتەرىن، ىشكى جان-دۇنيەسىن كورسەتۋ – سۋرەتشىنىڭ زور ەڭبەگى مەن تىنىمسىز ىزدەنىسىنىڭ ناتيجەسى. الەمگە ايگىلى سكريپكاشى ايمان مۇساحودجايەۆا، ايگىلى كارديوحيرۋرگ يۋريي پيا، بوتاي مادەنيەتىن زەرتتەۋشى عالىم ۆيكتور زايبەرت، الەم چەمپيونى سەرىك ساپييەۆ بەينەلەرى سۋرەتشىنىڭ قاپىسىز جەتىستىگىن ايگىلەپ تۇرادى.
قازاق رۋحىنىڭ الداسپاندارى ءابىش كەكىلبايەۆ، فاريزا وڭعارسىنوۆا، گەرولد بەلگەر، اقسەلەۋ سەيدىمبەك، ەسكەندىر حاسانعالييەۆ، ساتىبالدى نارىمبەتوۆ تۇلعالارى سۋرەتشىنىڭ قىل قالامى ارقىلى ەل جۇرەگىندە ماڭگىلىككە قالدى.
«بۇل ادامدار – ەل مۇددەسىن بيىك قويعاندار، شىن مانىندە، ۇلتجاندىلىقتىڭ وزىق ۇلگىسىن كورسەتكەندەر. تاۋەلسىز قازاقستاننىڭ تۇعىرلى تۇلعالارى جۇرتىنىڭ جادىندا، ەلىنىڭ ەسىندە ماڭگى ساقتالادى. بۇل كورمە بۇدان بىلاي دا تۇراقتى تۇردە وتكىزىلىپ تۇرادى، سونداي-اق ەكسپوزيسيالار بۇگىنگى تانىمال تۇلعالاردىڭ پورترەتتەرىمەن تولىقتىرىلماقشى»، - دەدى كورمەنى ۇيىمداستىرۋشىلاردىڭ ءبىرى بەلگىلى جازۋشى ءارى سۋرەتشى الىبەك اسقار.
ايتا كەتەيىك، بۇل ءىس-شارانى ق ر مادەنيەت جانە سپورت مينيسترلىگىنىڭ قولداۋىمەن «گەرالديكالىق زەرتتەۋلەر ورتالىعى» ۇيىمداستىردى.