تاۋەلسىزدىك – مەملەكەتىمىزدىڭ التىن دىڭگەگى، دەربەستىگىمىزدىڭ بەرىك نەگىزى
قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ «تاۋەلسىزدىك تاعىلىمى» اتتى ماقالاسى - قازاقستاننىڭ تاريحي تابىستارىن زەردەلەۋ قۇجاتى. ال تاۋەلسىزدىكتىڭ قاستەرلى تاريحىن پايىمداۋ - بۇگىندە قوعامىمىزدا بەرىك ورنىققان ۇلى ءداستۇر. قازاقستاننىڭ بۇكىل الەم تانىپ، جوعارى باعالاعان، ءوز حالقى ماقتان تۇتىپ، كوزدىڭ قاراشىعىنداي ساقتاپ قۇرمەتتەيتىن كۇنى.
تاۋەلسىزدىگىمىزدىڭ تابىستى 30 جىلدىعى – وتانىمىزدىڭ ءاربىر ازاماتى ءۇشىن، ءاربىر ۇرپاعى ءۇشىن باعا جەتپەس ومىرلىك ماڭىزدى قۇندىلىق. ال، ەلباسى ءۇشىن حالقىنىڭ تاۋەلسىزدىگىنىڭ نەگىزىن قالاۋ جولىنداعى ماڭداي تەرىنىڭ، «كۇندىز بەل جازباي، تۇندە ۇيىقتاماي» ەتكەن ەڭبەگىنىڭ، قاجىماس-قايتپاس كۇرەسكەرلىگىنىڭ، كەمەڭگەر كوسەمدىگىنىڭ جەمىسىندەي بەينەلى پەرزەنتى.
«قاز تۇرىپ، قادام باسقان تاۋەلسىزدىك سابيلىك تۇساۋىن ومىرشەڭ ۋاقىتتا كەستىرگەن كەزدەن باستاپ، وسىناۋ 30 جىلدىڭ بەدەرىندە ايشىلىق جەردى التى رەت اتتاعان الىپ سەكىلدى، ءداۋىر جالىن مىعىم ۇستاپ، تىزگىنىن بەكەم قاعا ءبىلدى»، - دەپ ەلباسىمىز نۇرسۇلتان ءابىش ۇلى نازاربايەۆ ايتقانداي، وتكەنىن قادىرلەيتىن، بۇگىنىن قىمبات تۇتاتىن، ەرتەڭىنە سەنەتىن ءبىزدىڭ تاۋەلسىز ەلىمىز بۇگىندە بۇكىل الەم تانىعان جان-جاقتى قۋاتتى مەملەكەتكە اينالىپ، ەڭ دامىعان 30 ەل قاتارىنا ەنۋگە باعىت الدى.
بۇل تابىستارعا ەلباسىمىز نۇرسۇلتان ءابىش ۇلى نازاربايەۆتىڭ ءوزىنىڭ كورەگەن دە سارا باسشىلىعىمەن جەتتىك.
حالقىمىزدا «باعالاي بىلمەگەنگە ب ا ق تۇرمايدى، قادىرلەي بىلمەگەنگە قۇت قونبايدى» دەگەن ءسوز بار. ەلىمىزدەگى كىمنىڭ بولسا دا جەراستى ەڭبەگىنەن عارىشتىق داڭققا دەيىنگى ارالىقتاعى مەرەيلى تابىسى تاۋەلسىز مەملەكەتىمىزدىڭ جەمىسى ەكەنىن ايتۋ ازاماتتىق نيەتىمىزدىڭ ادالدىعىن بىلدىرمەك. بىزدەردىڭ، قازاقستاندىقتاردىڭ، باعىمىز دا، قۇتىمىز دا – ۇلى تاۋەلسىزدىگىمىز. ەل تاۋەلسىزدىگىن باعالاپ، قادىرلەپ، ۇرپاقتان ۇرپاققا ابىرويىن اسقاقتاتىپ امانات ەتىپ تاپسىرىپ وتىرۋ پارىزى – ءبارىمىزدىڭ دە باقىتىمىزدىڭ قاينار كوزى. ول قازاقستان تاعدىرىمەن ءارقايسىسىمىزدىڭ تاعدىرىمىزدىڭ ءبىرتۇتاس بىرلىگىنەن تۋىندايدى.
قازاقستان رەسپۋبليكاسىنىڭ تاۋەلسىزدىك تۇعىرىنىڭ بەرىكتىگى مەن ەلدىگىمىزدىڭ تۇتاستىعى ەلباسىمىز، ەگەمەندى ەلىمىزدىڭ تۇڭعىش پرەزيدەنتى ن.ءا.نازاربايەۆتىڭ سارابدال ساياساتىنىڭ ارقاسى ەكەندىگى بارشامىزعا ايان. قازاقستان – ءبىرتۇتاس جەر، ءبىرتۇتاس حالىق، ءبىرتۇتاس بولاشاق دەسەك، ەلباسى ن.ءا.نازاربايەۆ بۇكىل سانالى عۇمىرىندا قازاقستان حالقىنىڭ باقىتتى ءومىرى، باياندى بولاشاعى ءۇشىن بار قاجىر-قايراتىمەن ەڭبەك ەتتى. وتكەنىمىزدى سارالاي قاراساق، ەلباسىنىڭ سىندارلى ساياساتىنىڭ ارقاسىندا قازاقستان تايعاق كەشۋلەردەن سۇرىنبەي ءوتىپ، بەدەلدى دە ابىرويلى، الەمدىك قاۋىمداستىق مويىنداعان، جەدەل دامۋدىڭ داڭعىل جولىنا تۇسكەن ەلدەردىڭ قاتارىنا ەندى.
تاۋەلسىزدىگىمىزدى باياندى ەتۋ، ەلىمىزدىڭ جارقىن بولاشاعى ءۇشىن قىزمەت ەتۋ – ءبارىمىزدىڭ اسىل بورىشىمىز ەكەندىگى داۋسىز.
تاۋەلسىزدىك – مەملەكەتىمىزدىڭ التىن دىڭگەگى، دەربەستىگىمىزدىڭ بەرىك نەگىزى.
دانىشپان حالقىمىزدا «ەل تاريحى – ەر تاريحى» دەگەن ءسوز بار. قازاق ۇعىمىندا ەل مەن ەر - ءبىرتۇتاس الەم. ءاربىر پەرزەنت كىشكەنتايىنان ەل ورتاسىندا وسەدى، ەل كوزىندە تاربيەلەنەدى.
تاۋەلسىزدىگىمىزدىڭ وتىز جىلىندا ەل تاريحىن جاساعان ەلباسىمىز نۇرسۇلتان ءابىش ۇلىنىڭ دا ەر تاريحى جاسالدى دەپ تۇسىنەمىن.
«ءوزىڭ ءۇشىن تۋىپ، ەلىڭ ءۇشىن ىزدەنىپ، ولشەۋسىز تەر توگۋ، ەرلىك جاساۋ، بۇل – ماڭگى ولمەس تىرلىك، وشپەس شىن ەرلىك»، - دەپ مەملەكەتتىك سىيلىقتىڭ يەگەرى، قازاقستان حالىق جازۋشىسى، اقىن حاميت ەرعالييەۆ ايتقانداي، تاۋەلسىزدىگىمىزدىڭ جەتىستىگى - ەلباسىمىزدىڭ ەرەن ەڭبەگىنىڭ جەمىسى.
ەلباسى ن.ءا.نازاربايەۆتىڭ Nur Otan پارتياسى ساياسي كەڭەسىنىڭ كەڭەيتىلگەن وتىرىسىندا (23.11.2021 جىل.) «ەلدىكتىڭ جەتى تۇعىرى» اتتى قاعيداتتار جيىنتىعىن جاريالادى.
«الەم قارتاسىندا قازاقستان دەگەن ەگەمەن ەلدىڭ ويىپ تۇرىپ ورىن الۋى ءۇشىن ايانباي ەڭبەك ەتتىك. ەندىگى كەزەكتە وسى جەتىستىگىمىزدى ەسەلەپ ارتتىرۋ ەل ىنتىماعى مەن تۇتاستىعىنا بايلانىستى. وتىز جىلدا 9،5 ميلليوننان استام ءسابي دۇنيەگە كەلدى. ولاردىڭ الدىڭعى شەبى وردا بۇزار وتىزعا تولىپ وتىر. بۇل – كوزى اشىق، كوكىرەگى وياۋ، ساناسى ازات، ويى وزىق جاڭا بۋىن. مەملەكەتتىلىكتى ساقتاپ، قازاقستاندى «ماڭگىلىك ەل» ەتۋ وسى ۇرپاققا جۇكتەلەتىن تاريحي ميسسيا دەپ سانايمىن»، - دەدى تۇڭعىش پرەزيدەنتىمىز نۇرسۇلتان ءابىش ۇلى. بۇل جاس ۇرپاققا جولداعان ۇندەۋى الداعى ۋاقىتتا جارعىلىق باسشىلىق بولاتىنىنا سەنەمىن. بۇل تاۋەلسىزدىگىمىزدىڭ التىن تىرەكتەرى بولارى ءسوزسىز.
ءسوزىمدى قورىتىندىلاي كەلە، نۇرسۇلتان ءابىش ۇلىنىڭ دەنساۋلىعىنىڭ مىقتى بولۋىنا، قۋات-كۇشىن ءالى دە حالىق يگىلىگىنە جۇمساي بەرۋىنە، ەڭبەگىنىڭ جەڭىستەرى مەن جەمىستەرىن حالقىمەن بىرگە كورۋىنە تىلەكتەستىگىمدى بىلدىرەمىن.