الماتىلىقتارعا قۇتقارۋشىلار مامىر مەرەكەلەرى قارساڭىندا قاۋىپسىزدىك ەرەجەلەرىن ەسكە سالدى
مامىر مەرەكەلەرى قارساڭىندا وڭىرلىك كوممۋنيكاسيالار قىزمەتىنىڭ الاڭىندا قازاقستان رەسپۋبليكاسى توتەنشە جاعدايلار مينيسترلىگى رەسپۋبليكالىق جەدەل قۇتقارۋ جاساعىنىڭ وكىلدەرى ءسوز سويلەپ، تۇرعىندارعا تابيعاتتا ءوزىن-وزى ۇستاۋ ەرەجەلەرىن ەسكە سالىپ، دەمالىستارىن ءقاۋىپسىز وتكىزۋ ءۇشىن قالاي ارەكەت ەتۋ قاجەتتىگى تۋرالى كەڭەستەرىمەن ءبولىستى.
اۋا رايى جىلىنعان سايىن دالادا دەمالاتىن تۇرعىندار سانى ارتىپ كەلەدى. بۇل رەتتە كوپتەگەن ادامدار تاۋلى ايماققا بارادى، دەمالىستارىن سۋ قويمالارىنىڭ جانىندا وتكىزەدى.
قۇتقارۋشىلار بۇل كەزەڭدەردە تاۋلى ايماقتا قار كوشكىنى ءقاۋپى ساقتالاتىنىن ەسكەرتىپ، وسىعان وراي ازاماتتارعا تاۋعا شىعۋدان باس تارتۋعا كەڭەس بەرەدى، دەپ حابارلايدى Almaty-akshamy.kz.
«الماتى ىلە الاتاۋىنىڭ ەتەگىندە ورنالاسقان. ءبىراز ۋاقىت تاۋعا شىعۋدان باس تارتۋ كەرەك، ويتكەنى تاۋدا قار كوشكىنى ءقاۋپى جوعارى، سوندىقتان ساق بولۋ قاجەت. قار كوشكىنى بولۋى مۇمكىن بەتكەيلەرگە بارۋدىڭ كەرەگى جوق»، - دەدى حالىقارالىق دارەجەدەگى قۇتقارۋشى، توتەنشە جاعدايلار مينيسترلىگىنىڭ ارداگەرى ءاليحان كوپجانوۆ.
تاۋلى ايماقتارداعى سۋ قويمالارى دا ءقاۋىپتى. رەسپۋبليكالىق جەدەل قۇتقارۋ جاساعى سۇڭگۋىر-قۇتقارۋ ءبولىمىنىڭ باستىعى اندرەي بىبچەنكو سۋداعى ءقاۋىپسىز ءجۇرىس-تۇرىس ەرەجەلەرى تۋرالى بايانداپ بەردى.
سونىمەن قاتار ول «سۋدىڭ ءوزى ءقاۋىپتى ەلەمەنت. مۇندا تاۋ ەتەگىندە، اسىرەسە، اعىسى قارقىندى، كولەمدى، كۇردەلى لاندشافتى جانە تىك جاعالاۋلارى بار تاۋ وزەندەرى بار. ەڭ باستى قاۋىپ-قاتەر - وزەندەرگە جاقىنداعاندا سالماعى 100-500 كەلىدەن اساتىن الىپ تاستاردى دا اعىزىپ اكەتىپ جاتادى»، - دەگەن ويىمەن ءبولىستى.
ال كەنەلەردىڭ بەلسەندىلىك ماۋسىمى ءدال وسى مامىردىڭ جىلى كۇندەرىنە كەلەدى، بۇل دا تاۋ اۋەسقويلارىنا ءقاۋىپ توندىرەدى. وسىعان بايلانىستى قۇتقارۋشىلار تۇرعىندارعا جابىق كيىم، كاپيۋشون كيىپ، جەڭى بار كيىم مەن شالبار كيۋدى، دەنەدە اشىق جەر قالدىرماۋعا كەڭەس بەرەدى.
"سونداي-اق بىر-بىرىڭىزگە كيىمدەرىڭىزدە كەنە بار-جوعىن تەكسەرتىپ الىڭىزدار"، - دەيدى رەسپۋبليكالىق جەدەل قۇتقارۋ جاساعىنىڭ باس قۇتقارۋشىسى ءادىلحان بالتاباي مىرزا.