كاۋاپ ازىرلەۋ ءۇشىن 12 ادام وت جاققان.
الماتى قالالىق تجد قىزمەتكەرلەرى ىلە-الاتاۋ ۇلتتىق تابيعي پاركىنىڭ ماماندارىمەن بىرگە رەيدتەر وتكىزىپ، ءورت قاۋىپسىزدىگىن ورەسكەل بۇزعان ونداعان دەمالۋشىلاردى انىقتادى، دەپ حابارلايدى Almaty-akshamy.kz
جالپى العاندا تاۋلى-ورماندى ايماقتا 30 شاقتى ءورت قاۋىپسىزدىگىن ەلەمەۋ دەرەگى انىقتالعان، ىلە-الاتاۋ ۇلتتىق تابيعي پاركىندە كاۋاپ ازىرلەۋ ءۇشىن 12 ادام وت جاققان. ولارعا 4 ميلليون 140 مىڭ تەڭگە ايىپپۇل سالىنعان.
"سونداي-اق، تۇنگى ۋاقىتتا كوك-جايلاۋدا ءۇش حاتتاما رەسىمدەلدى - 22:00-دەن 03:00-گە دەيىن، ەر ادامدار جىلىنۋ ءۇشىن وت جاققان. سونىمەن قاتار، تاۋلى-ورماندى جەرلەردە ءورت قاۋىپسىزدىگىن بۇزعان 17 ادام اقبتك-نىڭ 505-بابى بويىنشا "قالالار مەن ەلدi مەكەندەردiڭ اۋماقتارىن اباتتاندىرۋ قاعيدالارىن بۇزۋ، سونداي-اق قالالار مەن ەلدى مەكەندەر ينفراقۇرىلىمى وبەكتىلەرىن بۇزۋ، جاسىل ەكپەلەرىن جويۋ جانە ءبۇلدىرۋ" بويىنشا اكىمشىلىك جاۋاپكەرشىلىككە تارتىلدى"، - دەدى الماتى تجد وكىلدەرى.
ۆەدومستۆو ماماندارى ورماندارداعى جانە ەرەكشە قورعالاتىن تابيعي اۋماقتارداعى ءورت قاۋىپسىزدىگى مەن سانيتارلىق ەرەجەلەردىڭ تالاپتارىن بۇزۋ جەكە تۇلعالارعا 100 ايلىق ەسەپتىك كورسەتكىش - 345 000 تەڭگە مولشەرىندە ايىپپۇل ارقالايتىنىن ەسكەرتەدى.
"جوعارى ءورت ءقاۋپى ساقتالاتىنىن ەسكەرە وتىرىپ، الماتى تجد بولىمشەلەرى قىزمەت وتكەرۋدىڭ كۇشەيتىلگەن نۇسقاسىنا اۋىستىرىلدى، قۇرعاق وسىمدىكتەر ورتىنە ۇشىراعان ۋچاسكەلەردە كۇندەلىكتى پاترۋل ۇيىمداستىرىلدى، "سويلەيتىن" دروندار پايدالانىلىپ جاتىر. ورمان شارۋاشىلىعى مەكەمەلەرىنىڭ اتتى جانە جاياۋ پاترۋلدەرى قىزمەت اتقارۋعا كومەكتەسەدى"، - دەيدى ۆەدومستۆو ماماندارى.
تجد-داعى دەمالۋشىلار مەن تۋريستەر ءۇشىن ىلە-الاتاۋ ۇلتتىق پاركىندە ىستىق تاماق دايىنداۋعا ارنالعان ارنايى جابدىقتالعان 14 ورىن بار ەكەنىن ەسكە سالادى. الماتى-اراسان شاتقالىنىڭ اۋماعىندا - ۇلكەن الماتى جانە كازاچكا وزەندەرىنىڭ بويىندا 12 ورىن. بۋتاكوۆكادا - 2 ورىن.