ازاماتتار اراسىندا تاۋ شاڭعىسى كۋرورتتارىنا سۇرانىستىڭ ايتارلىقتاي وسكەنى بايقالادى. ۇكىمەت وتىرىسىندا بايانداما جاساعان مادەنيەت جانە سپورت ءمينيسترى اسحات ورالوۆ وسىلاي مالىمدەدى.
«ازاماتتار اراسىندا تاۋ شاڭعىسى كۋرورتتارىنا سۇرانىستىڭ ايتارلىقتاي ءوسۋى بايقالادى. بۇل فاكت ءتۋريزمنىڭ وسى سەگمەنتىنىڭ جوعارى الەۋەتىن كورسەتەدى. ورتا ەسەپپەن شاڭعى تەبۋگە كەلگەن تۋريستەر جاعاجاي تۋريستەرىنە قاراعاندا 5 ەسە كوپ اقشا جۇمسايدى جانە ولاردىڭ سانى جىل سايىن 30%-عا وسۋدە. تالداۋعا سايكەس، الماتى اگلومەراسياسىنداعى تاۋ شاڭعىسى كۋرورتتارىنا سۇرانىس اعىمداعى ۇسىنىستان ەداۋىر اسىپ تۇسەدى. قازىرگى ۋاقىتتا وڭىردەگى بارلىق تاۋ شاڭعىسى كۋرورتتارىنىڭ جالپى وتكىزۋ قابىلەتى كۇنىنە 10 مىڭ شاڭعىشىنى قۇرايدى، ال الەۋەتتى سۇرانىس الدەقايدا جوعارى»، - دەپ باياندادى مينيستر.
ۆەدومستۆو باسشىسىنىڭ ايتۋىنشا، بۇل ماسەلەنى شەشىپ، بارلىق مۇمكىندىكتى تولىق پايدالانۋ ءۇشىن جاقىن ارادا ينۆەستيسيالىق جوبالار ازىرلەنەدى.