«قورعاۋشى-زاششيتنيك» باۋ-باقشا سەرىكتەستىگىندە (ۋچ. 62/4 (98)) سالىنىپ جاتقان ءۇش قاباتتى عيمارات رۇقسات قۇجاتتارىنسىز بوي كوتەرگەن، دەپ حابارلادى الماتىنىڭ قالا قۇرىلىسى باقىلاۋ باسقارماسى.
جوبالىق-سمەتالىق قۇجاتتاماسىز، اۆتورلىق جانە تەحنيكالىق قاداعالاۋسىز، سونداي-اق قۇرىلىس-مونتاج جۇمىستارىنىڭ باستالعانى تۋرالى حابارلاماسىز ءبىر ۋچاسكەدە ءۇش قاباتتى جانە ءبىر قاباتتى كۇردەلى قۇرىلىستار تۇرعىزىلعان. نىسان سىبايلاس جەمقورلىققا قارسى قىزمەتپەن بىرلەسكەن جۇمىس بارىسىندا انىقتالدى.
2024 جىلدىڭ 19 شىلدەسىندە باسقارما جەر ۋچاسكەسىنىڭ يەسىنە (جەكە تۇلعاعا) زاڭسىز قۇرىلىستى بۇزىپ، جەر تەلىمىن باستاپقى قالپىنا كەلتىرۋ تۋرالى بۇزۋشىلىقتاردى جويۋ جونىندە نۇسقاما بەردى.
نۇسقاما تالاپتارىن ورىنداۋ ماقساتىندا نىساننىڭ يەسى عيماراتتى ءوز ەركىمەن بۇزا باستادى.
ەسكە سالا كەتەيىك، الماتى اكىمى ەربولات دوسايەۆتىڭ قۇرىلىسقا باقىلاۋدى كۇشەيتۋ تۋرالى تاپسىرماسى اياسىندا وتكەن جىلدىڭ باسىنان بەرى 52 زاڭسىز نىسان تولىق نەمەسە جارتىلاي ءسۇرىلدى، ونىڭ ىشىندە «مەچتا»، KHAN، «الما گاردەن» تۇرعىن ءۇي كەشەندەرى جانە باسقا دا نىساندار بار.