تج ءمينيسترى بۇيرىعىمەن سۋعا باتقان بالانى قۇتقارعانى ءۇشىن ءاليحان جاقسىلىق ماراپاتتالدى.
توتەنشە جاعدايلار ءمينيسترى گەنەرال-مايور شىڭعىس ءارىنوۆتىڭ بۇيرىعىمەن 2024 جىلعى 27 قازاندا الماتىدا بولعان بالانىڭ ءومىرىن سۋدان قۇتقارۋ كەزىندە كورسەتكەن باتىلدىعى مەن جانقيارلىعى ءۇشىن قىزىلوردا قالاسىنىڭ تۋماسى ءاليحان ساكەن ۇلى جاقسىلىق «سۋعا باتقانداردى قۇتقارعانى ءۇشىن» مەدالىمەن ماراپاتتالدى.
ماراپاتتى تجم باسشىسىنىڭ اتىنان الماتى قالاسى تجد باستىعى نۇرلان اتىعايەۆ تابىستادى، دەپ حابارلايدى aqshamnews.kz.
شۇعىل ىس-ارەكەتىڭىزدىڭ ارقاسىندا قايعىلى جاعدايدىڭ الدى الىنىپ، بالانىڭ ءومىرىن قۇتقارعانىڭىز ءۇشىن العىسىمىزدى بىلدىرەمىز، - دەدى تجد باسشىسى.
25 جاستاعى قۇتقارۋشىنىڭ ايتۋىنشا، 27 قازاندا قىزىلوردا قالاسىنان جالعا الاتىن پاتەر ىزدەپ كەلگەن ءاليحان ساعات 14:00 شاماسىندا ەسەنتاي وزەنى ماقاتايەۆ كوشەسىنىڭ قيىلىسىنداعى جاعالاۋىندا كەلە جاتقاندا بالالاردىڭ كومەككە شاقىرعانىن ەستىگەن.
بالا ەسەنتاي وزەنىنىڭ كاسكادىندا تۇرىپ، سۋعا قۇلاپ، ونى قاتتى اعىن الىپ كەتكەن ەكەن. قاس-قاعىم ساتتە ومىرىنە ءقاۋىپ تونگەنىنە قاراماستان، ءا.جاقسىلىق دەرەۋ تەمىر قورشاۋدان سەكىرىپ، سۋعا باتىپ بارا جاتقان بالانى قۇتقارۋعا كىرىستى. سۋدىڭ ۇلكەن اعىنىنان السىرەگەن بالانى جەر بەتىنە كوتەرىپ الىپ شىقتى.