ونى الماتىداعى مۇحتار اۋەزوۆ اتىنداعى كىتاپحانادا تۇساۋى كەسىلگەن «شاپشاڭ تاسباقا» ەرتەگىلەر جيناعىنان وقىپ بىلۋگە بولادى. قازاق ادەبيەتىنىڭ كەنجەلەپ كەلە جاتقان تۇسى - بالالار ادەبيەتى دەسەك، ونىڭ ىشىندە ەرتەگى جانرىنىڭ جازىلۋى دا، وقىلۋى دا سيرەپ كەتكەنى راس.
تۇساۋكەسەرگە جينالعان كوزى قاراقتى وقىرمان بالالار ادەبيەتىنە قوسىلعان ولجاعا قۋانىپ، قالامگەرلەر قاۋىمى جاڭا كىتاپتى تانىستىرىپ، لەنتاسىن كەستى. كىتاپتىڭ اۆتورى جۋرناليست اينۇر مۇراتوۆا ءوز بالالارىنا ەرتەگى ايتىپ بەرۋ كىتاپ جازۋعا شابىت بەرگەنىن ايتا كەلە، بالانىڭ قولىنا كىتاپ ۇستاتۋ ءۇشىن اتا-انا وزىنەن باستاسىن دەدى.
كىتاپ بۇدان بۇرىنعى ەرتەگى كىتاپتاردان ءبىرشاما جاڭالىعىمەن، زاماناۋيلىعىمەن ەرەكشەلەنەدى. ءبىر جاعى قازاق تىلىندە، ەكىنشى جاعى اعىلشىنشا Twinbook فورماتىندا جازىلعان ەرتەگىنىڭ ىشىندەگى QR كود ارقىلى مۋلتفيلم نۇسقاسىن دا تاماشالاۋعا بولادى. جيناقتىڭ بۇل ارتىقشىلىعىن جينالعان جۇرت كىتاپ وقۋى قيىن قازىرگى بالانى قىزىقتىراتىن تاماشا ءتاسىل دەپ باعاسىن بەردى.
ەرتەگىنىڭ تۇساۋىن مولداحمەت قاناز، بايبوتا قوشىم-نوعاي، ءدىلدار مامىربايەۆا، قانات قايىم سىندى ءبىر توپ قالامگەر كەسىپ، اۆتوردىڭ قالامىنا قۋات تىلەپ، جۇرەكجاردى سوزدەرىن ارنادى.
«امەريكالىق لاميا ەسىمدى جازۋشى قىز، (ارىپتەسىم نازيرا بايىربەكتىڭ جاقىن قۇربىسى) مەنىڭ وسى بۇگىن تۇساۋى كەسىلىپ، وقىرمانعا جول تارتقان «شاپشاڭ تاسباقا» دەپ اتالاتىن ەرتەگىلەر جيناعىمدى اعىلشىن تىلىنە اۋدارۋعا ىقىلاس تانىتتى. ءسويتتى دە، ءار ەرتەگىمنىڭ اۋدارماسىنىڭ بەس نۇسقاسىن جىبەرىپ تاڭعالدىردى عوي. ءبىر نۇسقاسى ءبىر نۇسقاسىنان اسىپ تۇسەدى. ءتىپتى، ولەڭدەتە اۋدارعانى دا بار. سول قىزىمىزدىڭ ارقاسىندا ەرتەگىلەرىم Twinbook فورماتىندا جارىق كوردى. ودان جي ارقىلى انيماسيالاپ، ماتىندەرىن Murat Almasbek پەن نازيرانىڭ امەريكا مەكتەبىندە وقيتىن قىزىنا وقىتىپ، ءبىر ەرتەگىنى عالىمجان قارامان ۇلىنىڭ انگليا مەكتەبىندە وقيتىن ۇلىنا وقىتىپ، ۆيدەونۇسقاسىن جاسادىم. بالالار الدىمەن قازاقشا ەرتەگىنى وقىپ، ۆيدەوسىن كورىپ، كەيىن اعىلشىنشاسىن وقىسا، ءتىلدى مەڭگەرۋگە وڭاي بولادى. اعىلشىن ءتىلىن تىڭداپ وتىرىپ، وقىسا، قازىرگى ءتىل ماماندارى ايتىپ جۇرگەن shadowing ادىسىمەن ءتىلدى تەز ۇيرەنۋگە مۇمكىندىك تۋادى»، دەدى ەرتەگى اۆتورى اينۇر مۇراتوۆا.