سولتۇستىك قازاقستاندا «قارا بازاردان» ءىرى كولەمدە تاركىلەنگەن سپيرت كادەگە جاراتىلادى دەپ حابارلايدى almaty-akshamy.kz
وبلىستىق مەملەكەتتىك مۇلىك جانە جەكەشەلەندىرۋ دەپارتامەنتىنىڭ شەشىمىمەن 46 مىڭ ليترگە جۋىق ءونىم قالالىق اۋرۋحانالاردىڭ بىرىنە تەگىن بەرىلدى. ەندى ودان انتيسەپتيك پەن دەزينفەكسيا قۇرالدارى جاسالادى. قويمادا تۇرعان ءسپيرتتىڭ بارلىعى ءبىر جارىم اي بۇرىن كولەڭكەلى بيزنەسپەن اينالىسپاق بولعان كاسىپكەردەن تاركىلەندى. جالپى سوماسى 82 ميلليون تەڭگەگە باعالانىپ وتىر. تاۋارعا بىردەن ساراپتاما جاسالىپ، ونىڭ ساپاسى تەكسەرىلدى.
- بۇل ءونىم قىركۇيەك ايىندا تاركىلەندى. ساپاسى جاقسى بولعاندىقتان ارنايى كوميسسيا ونى جويىپ جىبەرگەنشە كادەگە جاراتۋ كەرەك دەگەن شەشىم قابىلدادى. كەيىن ول اۋكسيونعا شىعارىلدى. ەڭ العاش بولىپ قالاداعى اۋرۋحانالاردىڭ ءبىرى ءوتىنىش بەردى. باستى تالاپ ولار مۇنى تەحنيكالىق ماقساتقا پايدالانۋى قاجەت - دەيدى وبلىستىق مەملەكەتتىك مۇلىك جانە جەكەشەلەندىرۋ دەپارتامەنتىنىڭ ءبولىم باسشىسى دۋلات قوجانوۆ