جۇڭگو عالىمدارى تابانى كۇرەكتەي شيرەك عاسىر بويى (25 جىل) ەكىنشى ءتيپتى قانت ديابەتىنەن زارداپ شەككەن 59 جاستاعى ناۋقاستى دىڭگەكتى جاسۋشىلار تەراپيا كومەگىمەن ەمدەپ جازدى.
بۇل جايىندا islam.kz پورتالى Cell Discovery مەرزىمدى باسىلىمىنا سىلتەمە جاساي وتىرىپ ءمالىم ەتەدى، دەپ حابارلايدى Almaty-akshamy.kz.
ناۋقاس ەر ادامعا 2021 جىلى دىڭگەكتى جاسۋشالار ترانسپلانتاسيالاندى. 2022 جىلدان بەرى قان قۇرامىنداعى قانت دەڭگەيىن باقىلاۋ ءۇشىن دارى-دارمەك قابىلدامادى. 25 جىل بويى سۋسامىردان زارداپ شەككەن ول ينسۋلين ىستەپ شىعاراتىن ۇيقى بەزىنىڭ تۇگەلگە دەرلىك جاسۋشىلارىنان ايىرىلعان بولاتىن. مۇنداي پاسيەنتتەر مۇنداي گورموننىڭ ورنىن تولتىرۋ ءۇشىن ۇدايى ينە سالۋعا ءماجبۇر بولادى. زەرتحاناداعى عالىمدار دىڭگەكتى جاسۋشالاردان ۇيقى بەزى جاسۋشالارىن جاسادى. مۇنداي جاسۋشالاردىڭ ەرەكشەلىگى ولار جاسۋشانىڭ كەز كەلگەن (جۇيكە، بۇلشىقەت، بۇيرەك، ت.ب.) تۇرىنە اينالۋى مۇمكىن. دىڭگەكتى جاسۋشانىڭ ناقتى قانداي جاسۋشاعا اينالاتىنى ورتاسىنا، دالىرەگى، بەلگىلى ءبىر زاتتار قۇرامىنا بايلانىستى.
بۇل زەرتتەۋدە عالىمدار ۇيقى بەزى جاسۋشالارىن تۇرلەندىرۋ ءۇشىن بەلگىلى ءبىر زاتتاردى پايدالاندى. وسى ۋاقىتقكا دەيىن بىردە-بىر ادام قانت ديابەتى دەرتىنەن قۇتىلعان ەمەس. قانداعى قانت دەڭگەيى دارى-دارمەكتى قابىلداماي-اق ۋاقىتشا قالىپتى دەڭگەيگە جاقىنداۋى مۇمكىن (رەميسسيا). ونىڭ وزىندە بۇل پاسيەنتتەردەن سالىستىرمالى تۇردە قاتاڭ ديەتا مەن جاتتىعۋ باعدارلاماسىن ساقتاۋدى قاجەت ەتەدى. عالىمدار بۇل ءادىستىڭ 1 ءتيپتى قانت ديابەتى بار ادامدارعا جارامايتىنىن العا تارتىپ وتىر. ويتكەنى، مۇنداي تەراپيادا يممۋندىق جۇيە ترانسپلانتتالعان ۇيقى بەزىنە (ورگانيزمگە بوگدە اگەنت رەتىندە قاراپ) شابۋىل جاسايدى. سوندىقتان ترانسپلانتاسيالانعان جاڭا جاسۋشالاردى جويىپ جىبەرەدى. بۇل باعىتتاعى زەرتتەۋ الەمدەگى ءولىم-جىتىمنىڭ توعىزىنشى سەبەبىنە اينالعان قانت ديابەتىمەن اۋىراتىن جارتى ميلليارد ادام ءۇشىن ۇلكەن قادام بولۋى مۇمكىن.