ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا «ءتاريفتى ينۆەستيسياعا ايىرباستاۋ» باعدارلاماسىنىڭ ىسكە اسىرىلۋ بارىسى قارالدى، دەپ حابارلايدى Almaty-akshamy.kz.
ناتيجەسىندە كوممۋنالدىق قىزمەتتەر تاريفتەرىنىڭ وزگەرۋى ۇستامدى بولىپ وتىر، تۇتىنۋشىلار مەن كاسىپورىندار مۇددەلەرىنىڭ بالانسى قامتاماسىز ەتىلىپ، ورتاشا ەسەپپەن 10-نان 30%-عا دەيىن وسەدى.
«تىرشىلىككە قاجەتتى جۇيەلەردى ءتيىمدى جاڭعىرتۋ جانە كۇردەلى جوندەۋ ءۇشىن «ءتاريفتى ينۆەستيسياعا ايىرباستاۋ» باعدارلاماسى ۇسىنىلدى. بۇل ءتاسىل ەنەرگيا ۇيىمدارىنىڭ قولدانىستاعى اكتيۆتەرىن قايتا جاڭعىرتۋعا جانە كەڭەيتۋگە، ەنەرگيا جۇيەسى جۇمىسىنىڭ سەنىمدىلىگىن ارتتىرۋعا جانە جابدىقتاردىڭ توزۋىن ازايتۋعا مۇمكىندىك بەرەدى»، - دەدى ءاليحان سمايىلوۆ.
ۇكىمەت باسشىسىنىڭ ايتۋىنشا، بيىل تۇرعىندار ءۇشىن تاريفتەر 10%-دان 30%-عا دەيىن وسەدى. بۇل – بارىنشا ۇستامدى تاريف، ونسىز كوممۋنالدىق ينفراقۇرىلىمنىڭ ساپالى جۇمىسىن قامتاماسىز ەتۋ مۇمكىن ەمەس.
«تاريف ماسەلەسىندە ءبىز بارلىق جاقتىڭ دا مۇددەلەرىن ەسكەرەتىن تەڭ ورتانى تابا ءبىلۋىمىز كەرەك. ياعني، سالانى دامىتۋ قاجەتتىلىگىن دە، حالىقتىڭ مۇمكىندىگىن دە ەسكەرۋگە ءتيىسپىز»، - دەدى پرەمەر-مينيستر.
ۇكىمەت باسشىسى ستانسيالار، كوممۋنالدىق كاسىپورىندار ءىس جۇزىندە 3 جىلدان استام ۋاقىت بويى تابىسسىز جۇمىس ىستەپ كەلەتىنىن، سوندىقتان جوندەۋ جۇمىستارىنا قاراجات سالىنباعانىنا توقتالدى. قاراجات سالىنسا دا، ول قارىز الۋ ارقىلى نەمەسە مەملەكەت ەسەبىنەن جۇزەگە اسىرىلدى.
«سوندىقتان، تاريفتەردى ءوسىرۋ – قاجەتتىلىك. ال «ءتاريفتى ينۆەستيسياعا ايىرباستاۋ» قاعيداتىن ەنگىزەتىن بولساق، ءتاريفتى وسىرۋدەن تۇسەتىن پايدا بىرەۋدىڭ قالتاسىنا كەتپەي، تىكەلەي ءوندىرىستى جاڭعىرتۋعا جۇمسالاتىنىنا سەنىمدى بولامىز. جاڭا تاريفتىك ساياسات اشىقتىق، ەسەپتىلىك جانە جاريالىلىق پرينسيپتەرىنە نەگىزدەلەتىن بولادى. ءتيىستى زاڭنامالىق تۇزەتۋلەر، نورماتيۆتىك قۇقىقتىق اكتىلەر قابىلداندى»، - دەدى ءاليحان سمايىلوۆ.
وعان قوسا ۇكىمەت باسشىسى تاريفتەردىڭ ءوسۋى از قامتىلعان وتباسىلاردىڭ تابىسىنا اسەر ەتپەيتىنىن ايتتى.
«جەرگىلىكتى بيۋدجەت قاراجاتى ەسەبىنەن از قامتىلعان وتباسىلارعا كوممۋنالدىق قىزمەتتەرگە اقى تولەۋ ءۇشىن تۇرعىن ءۇي كومەگى بەرىلۋدە. ول كوممۋنالدىق قىزمەتتەرگە جۇمسالاتىن شىعىستار وتباسىنىڭ اي سايىنعى ورتاشا جيىنتىق تابىسىنىڭ 10%-نان اسىپ كەتكەن جاعدايدا تولەنەدى»، - دەدى ۇكىمەت باسشىسى.
جالپى، ۇكىمەت باسشىسىنىڭ ايتۋىنشا، ءقازىر ورتالىق جانە جەرگىلىكتى اتقارۋشى ورگاندار كوممۋنالدىق سەكتوردا اۋقىمدى جۇمىستار جۇرگىزۋدە. سول سەبەپتى بىردە-بىر ءوڭىر جىلىتۋ ماۋسىمىندا اپاتتارعا جول بەرمەۋى ءتيىس.