تارازدا قازاقستان پرەمەر-مينيسترى ءاليحان سمايىلوۆ پەن قىرعىزستان مينيسترلەر كابينەتىنىڭ ءتوراعاسى – پرەزيدەنت اكىمشىلىگىنىڭ باسشىسى اقىلبەك جاپاروۆتىڭ قاتىسۋىمەن قازاق-قىرعىز ۇكىمەتارالىق كەڭەسىنىڭ 11ء-شى وتىرىسى ءوتتى، دەپ حابارلايدى Almaty-akshamy.kz
شاعىن جانە كەڭەيتىلگەن قۇرامدا وتكەن كەلىسسوزدەر بارىسىندا تاراپتار ەكىجاقتى ىنتىماقتاستىقتىڭ وزەكتى ماسەلەلەرى بويىنشا پىكىر الماستى.
ەكى ەلدىڭ ورتالىق مەملەكەتتىك ورگاندارىنىڭ باسشىلارى قاتىسقان ۇكىمەتارالىق كەڭەستىڭ نەگىزگى تاقىرىپتارى ساۋدا-ەكونوميكالىق ىنتىماقتاستىقتى نىعايتۋ، سۋدى پايدالانۋ جانە ەنەرگەتيكا سالاسىنداعى ءوزارا ءىس-قيمىل، ونەركاسىپ پەن اوك-تە كووپەراسيالىق جوبالاردى ىسكە اسىرۋ، رەسپۋبليكالاردىڭ ترانزيتتىك-كولىك الەۋەتىن دامىتۋ، تۋريزم جانە مادەنيەت سالالارىنداعى بىرلەسكەن باستامالار بولدى.
ءاليحان سمايىلوۆ ەكى ەلدىڭ مەملەكەت باسشىلارىنىڭ كۇش-جىگەرىنىڭ ارقاسىندا سوڭعى جىلدارى قازاق-قىرعىز ستراتەگيالىق سەرىكتەستىگى جاڭا سەرپىنگە يە بولعانىن اتاپ ءوتتى.
«قىرعىزستان ءبىز ءۇشىن تاتۋ كورشى، باۋىرلاس ەل عانا ەمەس، سونداي-اق ماڭىزدى ساۋدا-ەكونوميكالىق سەرىكتەس مەملەكەت بولىپ تابىلادى»، — دەدى ۇكىمەت باسشىسى.
رەسپۋبليكالار اراسىندا ءوزارا تاۋار اينالىمى تۇراقتى تۇردە وسۋدە. 2022 جىلى ساۋدا كولەمى شامامەن 19%-عا ۇلعايىپ، $1،3 ملرد-قا جەتتى. سونىمەن بىرگە بيىل دا وڭ ديناميكا بايقالىپ وتىر: 7 ايدا تاۋار اينالىمى 13%-عا ءوسىپ، $757 ملن-دى قۇرادى.
سونىمەن قاتار پرەمەر-مينيستردىڭ ايتۋىنشا، ترانزيت، كولىك، كوممۋنيكاسيا، تۋريزم جانە باسقا سالالاردا ىنتىماقتاستىق دامىپ كەلەدى. ونەركاسىپتىك كووپەراسيا، اۋىل شارۋاشىلىعى، سيفرلاندىرۋ سالالارىندا جاقسى پەرسپەكتيۆالار بار.
ۇكىمەت باسشىسىنىڭ سوزىنشە، وسى تۇرعىدا ءبىرقاتار ماڭىزدى بىرلەسكەن جوبانى ىسكە اسىرۋدى جەدەلدەتۋ قاجەت. اتاپ ايتقاندا، جاقىن ارادا شەكارا ماڭىنداعى اۋماقتاردا يندۋستريالىق ساۋدا-لوگيستيكالىق كەشەن قۇرۋ جاڭا كووپەراسيالىق جوبالاردى جۇزەگە اسىرۋعا ىقپال ەتەتىن بولادى. بۇل سونداي-اق ەكى مەملەكەت باسشىلارىنىڭ تاۋار اينالىمىن $2 ملرد-قا دەيىن ۇلعايتۋ جونىندەگى تاپسىرماسىنا قول جەتكىزۋگە ۇلەسىن قوسادى.
قازاقستان مەن قىرعىزستان ۇكىمەتتەرىنىڭ باسشىلارى ەكى ەلدىڭ مۇددەلەرىن ەسكەرە وتىرىپ، ءوزارا قۇرمەت پەن تاتۋ كورشىلىككە نەگىزدەلگەن سۋ سالاسىنداعى تىعىز ءوزارا ءىس-قيمىلدى جالعاستىرۋعا كەلىستى.
«ءبىزدىڭ حالىقتارىمىزدىڭ ومىرىنە تىكەلەي اسەر ەتەتىن ەكولوگيا جانە سۋدى ۇتىمدى پايدالانۋ سالاسىندا ىنتىماقتاستىقتى دامىتۋ اسا ماڭىزدى بولىپ تابىلادى. سۋ رەسۋرستارىن ءادىل جانە اشىق باسقارۋدى قامتاماسىز ەتۋ ماقساتىندا بىزگە مەملەكەتارالىق سۋ شارۋاشىلىعى كانالدارىن سيفرلاندىرۋ ارقىلى ءتيىمدى مونيتورينگ جۇرگىزۋ تەتىگى قاجەت. گيدرولوگيالىق اقپارات الماسۋدى، اتاپ ايتقاندا، سۋ قويمالارىنا كەلەتىن اعىن سۋ جانە باسسەين بويىنشا سۋ الۋ جونىندە اقپاراتتارمەن قامتاماسىز ەتۋ ماڭىزدى»، — دەدى ق ر پرەمەر-مينيسترى.
ۇكىمەت باسشىسىنىڭ پىكىرىنشە، سۋ رەسۋرستارىن بىرلەسىپ پايدالانۋدىڭ قۇقىقتىق تەتىگىن جەتىلدىرۋ ءوزارا ءتيىمدى ىنتىماقتاستىقتى نىعايتۋعا ىقپال ەتەتىن بولادى.
ۇكىمەت باسشىسى سونداي-اق مادەني-گۋمانيتارلىق بايلانىستاردىڭ دا بەلسەندى تۇردە دامىپ كەلە جاتقانىن ايتتى.
«قازاقستاننىڭ 2021 جىلى قىرعىزستانداعى، 2022 جىلى قىرعىزستاننىڭ قازاقستانداعى مادەنيەت كۇندەرى پراكتيكالىق جانە رۋحاني بايلانىستاردىڭ دامۋىنا وڭ سەپتىگىن تيگىزدى»، — دەدى ءاليحان سمايىلوۆ.
قىرعىزستان مينيسترلەر كابينەتىنىڭ ءتوراعاسى – پرەزيدەنت اكىمشىلىگىنىڭ باسشىسى اقىلبەك جاپاروۆ ەكى مەملەكەت باسشىلارىنىڭ جۋىرداعى ءوزارا ساپارلارى بارىسىندا ەكىجاقتى ىنتىماقتاستىقتىڭ نەگىزگى باعىتتارى ايقىندالعانىن ەسكە سالدى.
«ەكى باۋىرلاس حالىقتىڭ يگىلىگى ءۇشىن ۋاعدالاستىقتاردى ىلگەرىلەتۋ ماقساتىندا بارىنشا كۇش سالاتىنىمىزعا سەنىمدىمىن»، — دەدى ا. جاپاروۆ.
كەلىسسوز قورىتىندىسىندا تاراپتار ىنتىماقتاستىقتىڭ بارلىق ءوزارا ءتيىمدى باعىتتارى بويىنشا بەلسەندى ءىس-قيمىلدى قولداۋعا دايىن ەكەندەرىن راستادى.