تارازدىق پوليسەيلەر قالا تۇرعىنىنان 45 كەلىدەي ەسىرتكى تاركىلەدى
“قاراسورا-2021” رەسپۋبليكالىق جەدەل الدىن الۋ ءىس-شاراسىن وتكىزۋ بارىسىندا جامبىل وبلىسىنىڭ پوليسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى شۋ-مەركى اۆتوجولىنان 4 شاقىرىم جەردە ورنالاسقان “سارعاۋ” قۇمعا جاقىن ماڭداعى ايماقتا ەسىرتكى زاتتارىن دايىنداۋ كەزىندە تاراز قالاسىنىڭ 41 جاستاعى تۇرعىنىن ۇستادى، دەپ حابارلايدى almaty-akshamy.kz
جاقىن ماڭداعى اۋماقتى تەكسەرۋ بارىسىندا جالپى سالماعى 44 كەلى 320 گرامم “كەپتىرىلگەن ماريحۋانا” ەسىرتكى زاتى بار ءتورت قاپ تابىلىپ، تاركىلەندى. ۇستالعان ازامات كىناسىن مويىنداپ، شۋ قالاسىنىڭ ۋاقىتشا ۇستاۋ يزولياتورىنا قاماققا الىندى.
– اتالعان دەرەككە قاتىستى ق ر قك 297-بابى 3-بولىگى (ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ، جونەلتۋ نەمەسە وتكىزۋ) بويىنشا سوتقا دەيىنگى تەرگەۋ امالدارى باستالدى. اتالعان قىلمىستى جاساعانى ءۇشىن مۇلكى تاركىلەنىپ، ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن، – دەدى وبلىستىق پوليسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى اسقار جۇمابەكوۆ.