ەربولات تولەپباي «ۇماي انا» كارتيناسىن ساتۋدان تۇسكەن 10 ملن تەڭگەنى تۇركياعا اۋداردى
تانىمال سۋرەتشى ەربولات تولەپباي «ۇماي انا» كارتيناسىن ساتۋدان تۇسكەن 10 ملن تەڭگەنى تۇركياداعى جەر سىلكىنىسىنەن زارداپ شەككەندەرگە اۋداردى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
ايتا كەتەرلىگى، سۋرەتشى تۇركياداعى اپاتتان كەيىن «قازاق ونەرىنىڭ تۇركياعا كومەگى» اكسياسىنا ۇيىتقى بولىپ، زەرگەر، سۋرەتشى، ءانشى، اكتەر، اقىن، جازۋشى سياقتى مادەنيەت جانە ونەر ايدىنىندا جۇرگەن بارشا ارىپتەستەرىن ءىس-شاراعا بەلسەندى اتسالىسۋعا شاقىرعان بولاتىن.
«جاريالانعان ۇندەۋدەن كەيىن اۋكسيون ماسەلەسىمەن اينالىستىم. ۇلكەن اۋكسيوندى كۇتكەنشە ءبىرشاما ۋاقىت وتەدى. ال قازىرگىدەي قيىن كەزەڭدە تۇركيا تاراپى قىرۋار قاراجاتقا مۇقتاج. سول سەبەپتى جەدەل اۋكسيون ۇيىمداستىردىم. وعان نەگىزىنەن قانات تولەمەتوۆ باستاعان بەس جىگىت اتسالىستى. رۇستەم قارايەۆ، ەرجان وماروۆ، ۆيتاليي كيم، ازامات سىرعابايەۆ سەكىلدى اتىمتاي جومارتتار بۇل ۇسىنىستى قوستادى»، - دەيدى ەربولاتتولەپباي.
سۋرەتشى اۋكسيونعا «ۇماي انا» كارتيناسىن قويعان سوڭ، ونى جوعارىداعى ەسىمدەرى اتالعان بەس جىگىت بىرىگىپ، 10 ملن تەڭگەگە ساتىپ العان.
«بۇل وتە ساپالى سالىنعان ءبىرتۋار شىعارمامنىڭ ءبىرى ەدى. اتىمتاي جومارت بەس جىگىت قوسىلىپ، اۋكسيون كەزىندە كارتينانى 10 ميلليون تەڭگەگە باعالادى. ولار اقىلداسا كەلە، شىعارمانى دا تۇركيا تاراپىنا سىيلىق رەتىندە تاپسىرۋعا شەشىم قابىلدادى. سودان تۇركيانىڭ الماتىداعى باس كونسۋلدىعىنا بارىپ، 10 ميلليون تەڭگەنى تۇركياداعى اپاتتان زارداپ شەككەن باۋىرلارىمىزعا كومەك رەتىندە اۋداردىق. «ۇماي انا» كارتيناسىن دا تابىستادىق»، - دەدى ول.
