جامبىل وبلىسىنىڭ ءبىر قيىرىندا تاسقا قاشالعان توعىزقۇمالاق تاقتاسى تابىلدى. بۇل - ۇلتتىق ويىننىڭ تامىرى تەرەڭدە جاتقانىننىڭ تاعى ءبىر دالەلدەدى. تانىمال ساياحاتشى، “Sayahat Time” جوباسىنىڭ اۆتورى ەرنار المابەك وسى كونە جادىگەردى كورسەتتى، - دەپ حابارلايدى aqshamnews.kz ءتىلشىسى.
ساياحاتشى تاستى جاپان دالادا ءجۇرىپ كەزىكتىرگەنىن ايتتى.
"وتاۋلارى، قازاندىعى - ءبارى بار. بۇل ۇلكەن تاستا توعىزقۇمالاق وينايتىن ەكى جەر ويىلىپ جاسالعان. تاستىڭ قاشان قاشالعانى بەلگىسىز، ءبىراق تۇرىك قاعاناتى كەزەڭىنە جاتادى دەگەن بولجام بار"، - دەيدى ول.
ساياحاتشىنىڭ ايتۋىنشا، ۆيدەوداعى تاس قاراحان كەسەنەسىنىڭ قاسىندا ورنالاسقان.
"تاستى ءوز كوزىممەن كورىپ، قاتتى اسەرلەندىم. بۇل جەر ءبىر كەزدەرى قايناپ جاتقان تىرشىلىكتىڭ ورتاسى بولسا كەرەك. ءبىراق ءقازىر اينالادا ەشتەڭە جوق. كونەدەن ەستەلىك بوپ تاس قانا قالعان"، - دەيدى ەرنار المابەك.
ايتا كەتەيىك، ويىن شامامەن 4000 جىل بۇرىن پايدا بولعان. عالىم مۇراتقان تانەكەيەۆتىڭ ايتۋىنشا، 1906 جىلى ورىس ەتنوگرافى نيكولاي پانتۋسوۆ العاش رەت توعىزقۇمالاققا تەوريالىق جاعىنان ساراپتاما جاساپ، ونىڭ ەرەجەسىن بەكىتكەن. وسى ساراپتاماعا سۇيەنە وتىرىپ، 1936 جىلى عالىم سارسەن امانجولوۆ ءقازىر وينالىپ جۇرگەن ويىن ەرەجەسىن تولىقتىرعان.
قارسىلاس ەكى ويىنشىدا 18 وتاۋدا 9 تاستان، 162 تاس بولادى. ويىن بارىسىندا ءار ويىنشى "تۇزدىق" الا وتىرىپ، ءوز تاسىن 82 تاستان اسىرۋعا ۇمتىلادى. ول ءۇشىن ماتەماتيكالىق قوسۋ، الۋ، كوبەيتۋ، ءبولۋ امالدارىن ويشا ءارى جىلدام قولدانادى. وسىلايشا، بۇل اقىل-ويدى دامىتاتىن، ينتەلەكتۋالدىق، زياتكەرلىك ويىن رەتىندە قالىپتاسقان.