قورعانىس ءمينيسترى تاعى ءبىر قىزمەتكە تاعايىندالدى
ق ر قورعانىس ءمينيسترى رۋسلان جاقسىلىقوۆ قازاقستاننىڭ سپورتتىق جانە جاۋىنگەرلىك سامبو فەدەراسياسىنىڭ باسشىسى بولىپ سايلاندى.
رۋسلان جاقسىلىقوۆتىڭ كانديداتۋراسىنا فەدەراسيانىڭ بارلىق مۇشەلەرى ءبىراۋىزدان داۋىس بەردى. ول بۇل قىزمەتكە ايدوس اقجانوۆتىڭ ورنىنا كەلدى، دەپ حابارلايدى aqshamnews.kz.
قوعامدىق بىرلەستىكتىڭ جاڭا باسشىسى رۋسلان جاقسىلىقوۆ – دزيۋدودان كسرو سپورت شەبەرى، بىرنەشە دۇركىن چەمپيون، سامبو مەن دزيۋدودان رەسپۋبليكالىق جانە حالىقارالىق جارىستاردىڭ جۇلدەگەرى.
«فەدەراسيا مۇشەلەرىنە ناتيجەلى جۇمىسى مەن ماعان كورسەتكەن سەنىمى ءۇشىن العىسىمدى بىلدىرەمىن. سپورتتىق جانە جاۋىنگەرلىك سامبو اسكەري جانە قۇقىق قورعاۋ قىزمەتىندە جەكە قۇرامدى دايارلاۋ جۇيەسىندە ءساتتى قولدانىلادى. ءبىز سپورتتىڭ بۇل ءتۇرىن، ونىڭ ىشىندە اسكەري-قولدانبالى سپورت رەتىندە كەڭ كولەمدە دامىتۋعا ۇلكەن كۇش سالامىز»، دەدى گەنەرال-پولكوۆنيك رۋسلان جاقسىلىقوۆ.
فەدەراسيانىڭ جاڭا پرەزيدەنتى الداعى جوسپارىن جاريالادى.
«2025 جىلى سامبو تمد-عا قاتىسۋشى مەملەكەتتەر دوستىق ارميالارىنىڭ اسكەري-سپورتتىق ويىندارىنىڭ باعدارلاماسىنا جانە قازاقستان قارۋلى كۇشتەرىنىڭ سپارتاكياداسىنا ەنگىزىلەدى. سونداي-اق جاستارعا اسكەري-پاتريوتتىق تاربيە بەرۋ ماقساتىندا كەشەندى سپورتتىق ءىس-شارالار، ونىڭ ىشىندە ق ر قورعانىس ءمينيسترىنىڭ كۋبوگىنا سامبودان اشىق رەسپۋبليكالىق تۋرنير وتكىزۋ جوسپارلانعان. باۋىرجان مومىش ۇلى اتىنداعى الماتى اسكەري-سپورت كوللەدجىندە سامبو بولىمشەسىن اشۋ جوسپاردا بار. وندا كوپ بالالى وتباسىلار، اسكەريلەر مەن اۋىل جاستارىنىڭ بالالارىنا ارتىقشىلىق بەرىلەدى. سپورتتىڭ بۇل ءتۇرىن جاپپاي دامىتۋ ماقساتىندا قارۋلى كۇشتەر قاتارىنا جاۋىنگەرلىك سامبودان مامان-نۇسقاۋشىلاردى شاقىرامىز»، دەدى فەدەراسيا پرەزيدەنتى.
ايماقتىق فەدەراسيالار دا داميتىن بولادى. بۇگىندە 1100ء-دىڭ ۇستىندەگى سەكسيادا قىرىق مىڭنان استام ادام سامبومەن شۇعىلدانادى.
حالىقارالىق سامبو فەدەراسياسىنا كىرەتىن فەدەراسيا سپورتتىق جانە جاۋىنگەرلىك سامبونى جاپپاي دامىتۋعا، سونداي-اق قازاقستاندىق سامبيستەردىڭ حالىقارالىق جارىستاردا ونەر كورسەتۋىنىڭ ناتيجەلىلىگىنە بارىنشا كۇش سالماق.