ەرتەگى كەيىپكەرلەرى مەن سيقىرلى ساندىق. الماتىدا پرەزيدەنتتىك شىرشا قالاي ءوتتى
الماتىدا ءداستۇرلى «تاڭعاجايىپ جاڭا جىل» اتتى پرەزيدەنتتىك جاڭا جىلدىق شىرشا ءوتىپ، 400 بالا قاتىستى. ولاردىڭ قاتارىندا جەتىم، اتا-اناسىنىڭ قامقورلىعىنسىز قالعان، از قامتىلعان جانە كوپبالالى وتباسىلار مەن ەرەكشە ءبىلىم بەرۋ قاجەتتىلىگى بار بالالار، سونداي-اق وقۋدا، سپورتتا جانە شىعارماشىلىقتا جەتىستىككە جەتكەن دارىندى بالالار دا بولدى، دەپ حابارلايدى aqshamnews.kz
مەملەكەت باسشىسى قاسىم-جومارت توقايەۆتىڭ اتىنان قوناقتاردى الماتى قالاسىنىڭ اكىمى ەربولات دوسايەۆ قۇتتىقتادى.
ەرتەگى كەيىپكەرلەرى – ولاف پەن جاڭا جىلدىق بۇعى مەرەكەلىك اتموسفەرانى ورناتتى. ولار بالالارمەن بىرگە قىزىقتى ساياحاتقا اتتانىپ، كۆەستتەردەن ءوتىپ، جۇمباقتاردى شەشتى. باستى ماقسات - قۇپيا ساندىقتىڭ سيقىرلى كىلتتەرىن تابۋ ەدى. بارلىق قۇپيانى اشىپ، ساندىقتى اشقان سوڭ بالالار اباي اتىنداعى قازاق ۇلتتىق وپەرا جانە بالەت تەاترى ارتيستەرىنىڭ ورىنداۋىنداعى «ششەلكۋنچيك» ەرتەگىلىك قويىلىمىنا تاپ بولدى. بۇل قويىلىم مەرەكەنىڭ شارىقتاۋ شەگى ەدى.
«بۇگىن ءبىز سيقىرلى عاجايىپتىڭ ءبىر بولىگىنە اينالدىق، بۇل كوڭىل-كۇيدى انيماتورلار مەن قىزىقتى تاپسىرمالار بار بايقاۋلار سىيلادى. اسىرەسە، ماعان سيقىرلى ساندىقتى اشۋ ءۇشىن كىلت ىزدەگەن قاتتى ۇنادى. ساندىقتى اشىپ، ونىڭ ءىشىن كورۋ ءۇشىن بىرىگىپ، جۇمباقتاردى تەز شەشۋىمىز كەرەك بولدى. بۇل وتە قىزىقتى ويىن بولدى، كەي تاپسىرما قيىنعا سوقتى، ءبىراق ءبىز ءبارىن بىرگە شەشتىك. بۇل كۇن مەندە ۇمىتىلماس اسەر قالدىردى»، – دەدى №17 مەكتەپ-ينتەرناتىنىڭ وقۋشىسى تالشىن قۇدۇسوۆا.
مەرەكەلىك باعدارلاما اياسىندا اياز اتا مەن اقشاقاردىڭ ءداستۇرلى بايقاۋلارى ءوتتى. ال كەش سوڭىندا بالالارعا تانىمال ارتيست SADRADDIN «پەسنيا» اتتى جاڭا جىلدىق ءانىن ورىنداپ بەردى.
«ماعان ەرتەگى الەمىنە ەنگەندەي اسەر قالدىردى، بارلىق جەردە عاجايىپ اتموسفەرا سەزىلدى! ءبىز ءۇشىن جىلدامدىقتى، تاپقىرلىقتى جانە باتىلدىقتى سىنايتىن قىزىقتى ويىندار مەن جارىستار ۇيىمداستىرىلدى. اسىرەسە، ماعان ءان ايتىپ، سيقىرلى كەيىپكەردى وياتىپ، ونى بيلەۋگە ماجبۇرلەيتىن راۋند ەرەكشە ۇنادى. ءسال قيىنداۋ، ءبىراق وتە قىزىقتى بولدى. ۋاقىتىمدى كەرەمەت وتكىزدىم، ءتىپتى ءوزىمدى ەرتەگى كەيىپكەرىندەي سەزىندىم»، – دەدى №6 ارنايى مەكتەپ-ينتەرناتىنىڭ وقۋشىسى اراي بايباساروۆا.
مەرەكە قوناقتارى قازاقستان رەسپۋبليكاسى پرەزيدەنتىنىڭ اتىنان جاڭا جىلدىق سىيلىقتار الدى.